खोज

दाङ, १३ जेठ ।

घोराही १८ मा बसोबास गर्दै आएका कुसुण्डा समुदायको उत्थानका लागि पैरवी गर्दै आएको खाद्य अधिकार सञ्जाल दाङ र फियान नेपाललको परियोजना स्थानीय पालिकालाई हस्तान्तरण गरिएको छ ।

विगत तीन वर्षदेखि कुसुण्डा समुदायको क्षेत्रमा भई रहेको कामको प्रगति र गर्नुपर्ने विषयसहितको दस्तावेज घोराही उपमहानगरपालिकाकी उपप्रमुख हुमा डिसी र वडा नम्बर १८ का वडा अध्यक्ष भरतमणि अर्याललाई हस्तान्तरण गरिएको छ ।

कार्यक्रममा उपप्रमुख डिसीले कुसुण्डा समुदायको हकहितका लागि हिजोका दिनबाट भई रहेका प्रयास सकारात्मक रहेको भन्दै अबका दिनमा पनि स्थानीय सरकारका तर्फबाट सक्दो सहयोग रहने प्रतिवद्धता जनाइन् ।

वडा नम्बर १८ का वडा अध्यक्ष अर्यालले संविधानले दिएको मौलिक अधिकार कार्यान्वयन गर्नु राज्यका तीन तहका सरकारको कर्तव्य रहेको बताए । उनले कुसुण्डा समुदायको उत्थानका लागि आवश्यक गास, बास, कपासको दीगो व्यवस्थापन गर्न आफुहरु गम्भीर रहेको बताए ।

फियान नेपालका लुम्बिनी प्रदेश संयोजक सुरेश गौतमले परियोजनामार्फत अधिकार प्रत्याभूत गराउने सवालमा भएको पैरवीबाट कुसुण्डा समुदायको विषयलाई अब स्थानीय सरकारले सार्थक बनाउने काममा ढिलाई गर्न नहुने बताए ।

कुसुण्डा समाज केन्द्रीय अध्यक्ष धनबहादुर कुसुण्डाले परियोजनामार्फत आफुहरुले धेरै कुराको बारेमा जानकारी पाएको तथा आफ्नो बारेमा वकालत गर्न सक्ने भएको बताए ।

खाद्य अधिकार सञ्जाल दाङकी अध्यक्ष साजिदा सिद्धिकी, कुसुण्डा समुदायका फनी कुसुण्डा, उर्मिला कुसुण्डा, हीमा कुसुण्डालगायतले राज्यले आफुहरुको उत्थानका विषयमा अझै गम्भीर बन्न नसकेको गुनासो गरे । शिक्षासँगै सीप र सीपबाट आयआर्जनका क्षेत्रमा जोड्ने काममा आफुहरुलाई अग्रसर गराउने नीति ल्याउन आग्रह गरेका थिए । कार्यक्रमको सहजीकरण खाद्य अधिकार संजालका सदस्य छवि पुरीले गरेका थिए ।