खोज

दाङ, ८ जेठ ।

नेकपा एमाले दाङको १४ औँ अधिवेशनबाट सर्वसम्मत नवनिर्वाचित पदाधिकारीसहित सदस्यहरुलाई शपथ ग्रहण गराईएको छ । कार्यक्रममा अध्यक्ष मन्डलका सदस्य हिराचन्द्र केसीले नवनिर्वाचन अध्यक्ष शिवकुमार आचार्यलाई शपथ ग्रहण गराएका थिए । त्यसपछि नवनिर्वाचित अध्यक्ष आचार्यले पार्टी पदाधिकारी र सदस्यहरुलाई शपथ ग्रहण गराएका थिए ।

शपथ ग्रहण समारोहपछि नेकपा एमालेका महासचिव शंकर पोखरेलले नवनिर्वाचित जिल्ला कमिटीलाई परिणाम देखिने गरी जिम्मेवारी वहन गर्न निर्देशन दिएका छन् । उनले दाङको कम्युनिस्ट आन्दोलन निकै पुरानो भएपनि निर्वाचनबाट पाउनु पर्ने उपलब्धी हासिन गर्न सफल नभएको स्मरण गराउँदै अब अबका दिनमा जुन सुकै गठबन्धन भएपनि एमालेले पराजित गरेर देखाउन सक्ने हुनुपर्ने बताए । नयाँ नेतृत्वले मिसन ८४ लाई मुख्य लक्ष्य बनाएर जिल्ला, पालिका, वडा तहसम्मको संयन्त्र क्रियाशील बनाउँदै नियमित अनुगमन र निगरानी गर्नुपर्ने बताए ।

यसैगरी, नेकपा एमालेका सचिव एवम् प्रदेश इन्चार्ज पद्मा अर्यालले सबैलाई साझा बनाएर काम गर्न आग्रह गरिन । उनले अबको कार्य दिशा र एजेन्डामा मिहिन रुपमा समिक्षा गर्दै पार्टी काममा लाग्नुपर्ने बताइन । अबको एक वर्ष कामको संकल्पलाई परिणाममा देखाउन ध्यान दिनुपर्नेमा जोड दिइन । नवनिर्वाचित अध्यक्षले आफ्नो टिमले परिणाम आउने गरि काम गर्ने विश्वास दिलाउँदै बिस्तृत योजनासहितको कार्यक्रम चाँडै सार्वजनिक गर्ने बताए ।

निवर्तमान अध्यक्ष हुकुम बस्नेतले जिल्लामा सर्वसम्मत नेतृत्व चयन गर्दै एमाले दाङबाट एकताको सन्देश प्रवाह गर्न पाएकोमा खुशी व्यक्त गरे । उनले मिसन ८४ लाई सफल पार्न अब जिल्ला नेतृत्वले गम्भीरतापूर्वक लाग्नेमा आफु विश्वस्त रहेको बताए । कार्यक्रममा दाङ जिल्ला इन्चार्ज चेतनारायण आचार्य,अध्यक्ष मण्डलका संयोजक नरुलाल चौधरी, लुम्बिनी प्रदेश कमिटी अध्यक्ष राधाकृष्ण कँडेल,अध्यक्ष मण्डलका सदस्य घनश्याम पाण्डे लगायतले अबका दिनमा काम नगर्नेलाई सम्मानपूर्वक विदाई गर्न ढिलाई गर्न नहुने बताए । नेकपा एमाले दाङका १४ हजार २ सय ५९ पार्टी सदस्यबाट छनोट भएर आएका ७ सय ८८ प्रतिनिधिबाट १ सय २० सदस्यीय नयाँ नेतृत्व चयन भएको हो ।।