सुनवल, ५ जेठ ।
२५ सय ६८ औँ वुद्ध जयन्तीको अवसरमा पश्चिम नवलपरासीको रामग्राम नगरपालिकाले सप्ताहव्यापी कार्यक्रमको आयोजना गरेको छ । रामग्राम नगरपालिकामा अवस्थित वुद्धसंग सम्बन्धित महत्वपूर्ण स्थल रामग्राम स्तुप र पण्डितपुरको प्रवद्र्धनमा टेवा पुर्याउने र स्थानीयलाई अपनत्व महसुस गराउने उद्देश्यले कार्यक्रमको आयोजना गरेको नगर प्रमुख धनपत यादवले बताए ।
शुक्रबार लुम्बिनी प्रदेश सरकारका उद्योग, पर्यटन तथा सहकारी मन्त्री खड्ग बस्नेतले कार्यक्रमको शुभारम्भ गरे । कार्यक्रममा बोल्दै मन्त्री बस्नेतले लुम्बिनी संग जोडेर रामग्राम स्तुप सहितका वुद्धस्थललाई समेटेर वुद्धपरिपथको विकास गर्न नीति तथा कार्यक्रम र बजेटमा व्यवस्था गरिने बताए । सुनवलको तरगौली ताल, रामग्राम, पण्डितपुर, सरावलको ककरपत्त नगर, बर्दघाटको वुद्धमंगल ताल, सुस्ताको अनोमाघाटलाई पाँच वर्ष भित्र पर्यटकीय गन्तव्यको रुपमा विकास गर्न पन्चवर्षीय योजना लागु गर्ने बताए । संघीय सरकार संग सहकार्य गरी दातृ निकायको समेत सहयोगमा महत्वपूर्ण पर्यटकीय तथा एतिहासिक स्थलको विकास गरिने बस्नेतले बताए ।
मन्त्री बस्नेतले प्रदेश सरकार बजेट निर्माणको चरणमा रहेको जानकारी दिंदै पुराना योजनालाई पूरा गरेर जनहितका योजना मार्फत जनतामा प्रदेशप्रतिको विश्वास बढाउने योजनामा रहेको जानकारी दिए । “प्रदेशको औचित्य पुष्टि हुने गरी वर्तमान सरकारले काम गर्छ”–बस्नेतले भने ।
कार्यक्रममा प्रदेश सभा सदस्य वैजनाथ कलवारले पण्डितपुुर वुद्धको मावली भएको दाबी गर्दै देवदह मावली हुनै नसक्ने उल्लेख गरे । सरकारी निकायको बेवास्ताकै कारण रामग्राम पण्डितपुर जस्ता क्षेत्र ओझेलमा परेको कलवारको भनाई थियो ।
रामग्राम नगरपालिकाले वुद्ध जयन्तीको अवसरमा विभिन्न खेलकुद प्रतियोगिता सहित जेठ १० गते वुद्ध जयन्तीको दिन रामग्राम स्तुपमा दिपप्रज्वलन सहित वुद्ध जयन्तीको समापन गर्ने जनाएको छ । नगर प्रमुख धनपत यादवले संघीय सरकारको उपेक्षाका कारण गौतम वुद्धको सिंगो अस्तु सुरक्षित रहेको स्थल ओझेलमा परेको गुनासो गरे । स्थानीय तहले सक्दो प्रयास आफ्नो तर्फबाट गरिरहे पनि संघीय सरकार मातहत रहेका स्थलमा काम गर्न अवरोध सृजना हुँदै आएको यादवको भनाई छ ।
कार्यक्रममा रामग्राम नगरपालिकाका उपप्रमुख सम्झना चौधरी, नेपाली काँग्रेसका कार्यवाहक सभापति विक्रम यादव, भ्रष्टाचार विरुद्धको नागरिक निगरानी समूहका अध्यक्ष रामजी ज्ञवाली, शिक्षा अधिकृत सुन्दर खनाल लगायतले वुद्ध स्थलको प्रवद्र्धनको विषयमा बोलेका थिए ।
३० चैत्र २०८१, शनिबार
