खोज

दाङ ,३० फागुन ।

उपचारको क्रममा बालकको मृत्यु भएपछि दाङको घोराही – १५ सडक बिभाग ओरालो नजिकै रहेको बुद्ध इनटरनेशनल हस्पिटललाई पीडीत पक्षले घेराउ गरेका छन् ।  राजपुर गाउँपालिका–१ पटौली नाकाका ९ वर्षीय सुरेश कुँवरको उपचारको क्रममा मृत्यु भएपछि मृतकका आफन्तले ज्यानको बदला ज्यान लिने भन्दै तोडफोड र आक्रमणको प्रयास गरेको प्रहरीले जनाएको छ । मृतकका आफन्तहरु आएर तोडफोड र आक्रमणको प्रयास गर्न थालेपछि जिल्ला प्रहरी कार्यालय र वडा प्रहरी कार्यालयबाट खटेको प्रहरीले टोलीले बुद्ध हस्पिटलमा कडा सुरक्षा दिएको छ ।

पीडीत पक्षले अहिले पनि हस्पिटल नजिकै नाराबाजी गरिरहेको जिल्ला प्रहरी कार्यालय दाङका डिएसपी जनक बहादुर मल्लले जानकारी दिए । सम्भावित घटना हुननदिन प्रहरीले ठूलो सङ्ख्यामा प्रहरी परिचालन गरेपनि पीडित पक्षले अहिले राति साढे ८ बजेसम्म पनि हस्पिटल नजिकै विभिन्न चर्को नाराबाजी गरिरहेको डीएसपी मल्लले जानकारी दिए । बिहान ११ बजेदेखि हस्पिटल तनाव ग्रस्त छ ।

घाँटीको समस्या देखेर आफन्तले कुँवरलाई बुधबार बिहान अस्पतालमा पु¥याएका थिए । घाँटीको दुईतिर दाना जस्ता गोला मासुहरू देखिएपछि बालक अभिभावकसँग हिडेर अस्पताल पुगेका थिए । अस्पतालका डाक्टरले घाँटीमा पिप जमेको र सुइँबाट तान्नुपर्ने भन्दै भित्र लगेको केहि समय नबित्दै  डाक्टरको लापरबाहीका कारण बालकको नाक तथा मुखबाट रगत बगेर मृत्यु भएको आफन्तले जानकारी दिए । समस्या समाधानका लागि कुनै छलफल र तयारी नभएको प्रहरीले बताएको छ । यस अघि पनि बुद्ध हस्पिटलमा एपेन्डिक्सको अप्रेसन गर्दा आन्द्रा काटिएको भन्दै आफन्तले तोडफोड र आक्रमणको प्रयास गरेका थिए ।।।