खोज

रोल्पा, ९ फाल्गुन ।

रोल्पाको तीन पालिकाले संयुक्त रुपमा फार्मेसी संचालन गर्ने भएका छन । रोल्पाको पूर्वी भेगमा रहेका सुनिलस्मृती गाउँपालिका, लुंग्री गाउँपालिका र सुनछहरी गाउँपालिकाको संयुक्त वैठकले फार्मेसी संचालन गर्ने निर्णय गरेको हो ।

सुनिलस्मृती गाउँपालिकामा रहेको प्राथमिक स्वास्थ्य केन्द्र सुलिचौरमा उक्त फार्मेसी संचालन गरिने भएको छ । फार्मेसी संचालनको लागि हाल तीनवटा पालिकाले १०÷१० लाख रुपैयाँको साझेदारी गर्ने निर्णय भएको सुनिलस्मृती गाउँपालिका अध्यक्ष मणिराम वुढाथोकीले जानकारी दिए ।

प्राथमिक स्वास्थ्य केन्द्र सुलिचौरमा हाल रोल्पाका सुनिलस्मृती गाउँपालिका सुनछहरी गाउँपालिका, लुङ्ग्री गाउँपालिका, थवाङ गाउँपालिका र रोल्पा नगरपलिकाका साथै प्यूठान जिल्लाको स्वर्गद्वारी नगरपालिकाका केही वडाबाट समेत नागरिकहरु सेवा लिन आउने गरेका छन् । पूर्वी रोल्पाको व्यापारिक केन्द्रको रुपमा रहेको सुलिचौरमा नागरिकहरूको सहजताका लागि तीन वटा गाउँपालिकाको साझेदारीमा उक्त फार्मेसी संचालन गर्न लागिएको हो । सर्वसाधारण जनतालाई कम शुल्कमै औषधी उपलव्ध गराउने उद्धेश्यले फार्मेसीको संचालन गर्न लागेका हौ सुनिल स्मृती गाउँपालिका अध्यक्ष मणिराम वुढाथोकीले भने ।

हाल तीस लाख रुपैयाँको शेयर रहने उक्त फार्मेसी संचालनका लागि कार्यविधि तयारी समिति समेत गठन गरिएको छ । समितिमा सुनिलस्मृती गाउँपालिका अध्यक्ष संयोजक तथा लुंग्री गाउँपालिका र सुनछहरी गाउँपालिका अध्यक्षहरु सदस्य रहेका छन् । ११ सदस्यीय उक्त समितिको अन्य सदस्यहरुमा तीनवटै गाउँपालिकाका प्रमुख प्रशासकीय अधिकृत, प्राथमिक स्वास्थ्य केन्द्र सुलिचौर व्यवस्थाप समितिका अध्यक्ष, प्राथमिक स्वास्थ्य केन्द्र सुलिचौरका प्रमुख, लुंग्री र सुनछहरी गाउँपालिकाका स्वास्थ्य शाखा प्रमुखहरु रहेका छन् । समितिको सदस्य सचिवमा सुनिलस्मृती गाउँपालिका स्वास्थ्य शाखा प्रमुख रहेका छन् ।

त्रिपालिकास्तरीय उक्त बैठकमा यस वर्ष सञ्चालित जिल्ला स्तरीय राष्ट्रपति रनिङ शिल्ड प्रतियोगिताको समीक्षा समेत गरिएको थियो । यसवर्षको राष्ट्रपति रनिङ शिल्ड प्रतियोगितामा अन्य पालिकाको तुलनामा भन्दा तीन वटा पालिकाको नतिजा कमजोर आएको थियो । आगामी दिनमा खेल क्षेत्रलाई कसरी सुधार गर्न सकिन्छ भन्ने विषयमा समेत गहन छलफल भएको लुङ्ग्री गाउँपालिका अध्यक्ष भरत कुमार थापाले जानकारी दिए ।

वैठकले जिल्लाको साझा सवालको विषयमा जिल्लाका सबै स्थानीय तह तथा प्रमुख जिल्ला अधिकारी समेतको उपस्थितिमा समन्वयात्मक वैठक गर्न आवश्यक रहेको निश्कर्ष निकालेको छ । जिल्लास्तरीय उक्त समन्वयात्मक बैठकको आयोजनाका लागि समन्वय गरिदिन जिल्ला समन्वय समिति रोल्पालाई अनुरोध गर्ने निर्णय गरेको वताइएको छ ।

सुनिलस्मृति गाउँपालिकाका अध्यक्ष मणिराम बुढाथोकीˏ सुनछहरी गाउँपालिकाका अध्यक्ष धनबहादुर पुनमगरˏ लुङ्ग्री गाउँपालिकाका अध्यक्ष भरतकुमार थापाको उपस्थिति रहेको थियो । वैठकमा सुनिलस्मृति गाउँपालिकाका प्रमुख प्रशासकीय अधिकृत गोविन्द भट्टराईˏ स्वास्थ्य शाखा प्रमुख मोतिम आलमˏ प्रशासकीय अधिकृत रनबीर बुढाˏ सहायक कम्प्युटर अपरेटर दुर्याेधन महराको सहभागितामा उक्त निर्णय गरिएको सुनिलस्मृति गाउँपालिकाको सचिवालयले जानकारी दिएको छ ।