खोज

बुटवल, १८ कार्तिक । बुटवलको नौलो बहुउद्देश्यीय सहकारी संस्था लिमिटेडले जाजरकोट भूकम्प पीडितहरुका लागि आर्थिक सहयोग उपलब्ध गराउने घोषणा गरेको छ । सहकारीको शनिबार बुटवलमा आयोजित १४ औं वार्षिक साधारण सभाको अवसरमा सरकारको राहत कोषमा संस्थागत २५ हजार रुपैयाँ आर्थिक सहयोग उपलब्ध गराउने घोषणा गरेको हो ।

संस्थाका अध्यक्ष माधव प्रसाद श्रेष्ठले दैविप्रकोपको बेला ससाना सहयोग र सहकार्य जरुरी रहने भन्दै थोरै भए पनि सहयोग गरेको बताए । साधारण सभाको उद्घाटन गर्दै बुटवल उपमहानगरपालिका वडा नं ७ का वडाअध्यक्ष पदमराज गाहाले मानवीय भाव र सहयोगमा सबैको अग्रसरता जरुरी रहेको बताए ।

साधारणसभामा वार्षिक प्रतिवेदन प्रस्तुत गर्दै कोषाध्यक्ष हिरा बहादुर केसीले सहकारीलाई सबल बनाउनका लागि शेयर सदस्यहरुलाई आधारभुत सहकारी शिक्षा सञ्चालन गरिनुका साथै सञ्चालक समिति, लेखा समिति, उप समिति तथा कर्मचारीहरुलाई क्षमता अभिवृद्धि, नेतृत्व विकास लगायतका कार्यक्रमहरु सञ्चालन गरिएको बताए । वि.स. २०६६ सालमा स्थापना भएको सहकारीमा ३ सय ३३ जना महिला तथा २ सय ७५ जना पुरुष गरि ६ सय ८ जना सदस्यहरु रहेको कोषाध्यक्ष केसीले जानकारी दिए । ६६ लाख ३३ हजार ४ सय रुपैया शेयर पूँजी रहेको सहकारीमा ३४ करोड ३३ लाख ५४ हजार २९४ रुपैया बचत संकलन भएको लेखा समिति संयोजक अनिल भण्डारीले बताए ।

वार्षिक उत्सवको अवसरमा शुभकामना व्यक्त गर्दै जागृत बचत तथा ऋण सहकारी संस्थाका अध्यक्ष कृष्ण पोखरेल, सन्दुक बचत तथा ऋण सहकारीका अध्यक्ष सोम खाती, पुष्प बहुउद्देश्यीय सहकारी संस्थाकी अध्यक्ष कल्पना थापा, उपाध्यक्ष ललिता वंशी ठकुरी, सचिव सुधन अधिकारीले सहकारीहरुमा देखिएका व्याप्त बेथिती अन्त्य गर्न पहल थाल्न सुझाव दिए ।