खोज

लमही, १७ कात्तिक ।

उपभोक्ताहरु ठगिएको गुनासो आउन थालेपछि शुक्रबार लमहीमा बजार अनुगमन भएको छ ।

बर्षमा एकपटक चाडपर्व नजिकिदै गर्दा लमही नगरपालिकाले लमही बजारको अनुगमनलाई तीब्र पारेको हो । सो अनुगमनबाट उपभोक्ता भने सन्तुष्ट छैनन् । उनीहरु एक बर्षमा औपचारिकता निभाएको गुनासो गर्छन् । अनुगमन गर्नु भन्दा पहिले व्यापक हल्ला गर्ने ब्यापारीहरुले म्याद गएको समान लुकाउने गरेको उपभोक्ताहरु बताउँछन् । त्यसैगरी पसलैपिच्छे एउटै सामग्रीको मूल्य फरक भएको उपभोक्ताहरु बताउँछन् । नागरिक समाज दाङका उपसंयोजक निम बहादुर थापा भन्छन्, “अनुगमन कम्तीमा ३÷३ महिनामा गरिनु पर्छ । पछिल्लो समयमा उपभोक्ताहरुको ढाड सेकिने गरी मनोमानी मूल्य वृद्धि भएको छ । अनुगमन, कारबाही छैन । त्यसकारण उपभोक्ता ठगिएका छन ।”

यता अनुगन टोलीले अनुगमनका क्रममा बीस हजार बढीको सामानहरु बरामद गरी नष्ट गरेको छ । लमहीको कान्छी रोडमा रहेको डिके सप्लायर्सले तीन वर्ष अघि नै म्याद गुज्रेका समान बिक्री गर्दै आएको फेला परेको छ । सप्लायर्सका नाममा पसल संचालन गरी विभिन्न ब्राण्डका भारतीय कम्पनीका मिठाईहरु ग्रामीण भेगमा लगेर सस्तो मूल्यमा बिक्री गर्दै आएको संचालकले स्विकार गरेका छन् ।

त्यसैगरी लमही नगरपालिका –५ सुनखोलीमा रहेको जय शम्भो पाउरोटी उद्योगले एक दिन अगाडिको मिति राखेर पाउरोटी बिक्रि गरेको तथ्य फेला परेको छ । उक्त उद्योगलाई नियन्त्रणमा लिएर आवश्यक कारबाही गरिने भएको छ । उद्योगले दुई जना बालकलाई समेत कामदारका रुपमा राखेकोले बाल ऐन अन्तर्गत संचालकलाई कारबाही प्रक्रियामा लैजाने वडा प्रहरी कार्यालयका प्रहरी निरीक्षक शकर श्रेष्ठले बताए ।

त्यसैगरी गितेस किराना पसलबाट म्याद गुज्रेको एक प्याकेट बिस्कुट, आचार्य डेरीबाट उत्पादन गरेको मिति नराखेको तीन पोका डोनट बरामद गरिएको छ ।

अनुगमनमा लमही नगरपालिकाका प्रशासन शाखा प्रमुख महेश थापा, अधिकृत लक्ष्मी सुवेदी, इलाका प्रशासन कार्यालय लमहीका प्रमुख उदयराज भट्टराई, वडा प्रहरी कार्यालय लमहीका प्रहरी वरिष्ठ सहायक निरीक्षक सुरज शाही, देउखुरी उद्योग वाणिज्य संघका उपाध्यक्ष केशवराज पोख्रेल, केशवराज घिमिरे, अक्कबर अलि, सोभाखर अर्याल, वसन्त कुमार भण्डारी लगायतको सहभागितामा अनुगमन गरिएको हो ।

अनुगमनका क्रममा फेला परेका अखाद्य बस्तु, म्याद गुज्रिएका सामानहरु बरामद गरी सबै नष्ट गरिएको छ । दर्ता नभएका पसलहरु नगरपालिकामा दर्ता गर्न, समयमा कर तिर्न, मानव स्वास्थ्यमा असर पर्ने खालका सामानहरु बिक्रीवितरण नगर्न व्यवसायीलाई अनुगमन टोलीले भनेको छ । डिके सप्लायर्स र जय शंभो पाउरोटी उद्योगलाई २०÷२० हजार रुपैयाँ जरिवाना गरिएको छ ।

यदि अटेरी गरेर त्यस्ता सामान बिक्री गरेको पाइए कानून अनुसार कारबाही गरिने लमही नगरपालिका प्रशासन शाखा प्रमुख महेश थापाले बताए ।