खोज

बुटवल, २९ असोज ।

रुपन्देही उद्योग संघको २३ औं अधिवेशनसंगै नयाँ नेतृत्व हत्याउन उद्योगी ब्यवसायीहरुको प्रचारप्रसार र लबिङ शुरु भएको छ । नेकपा (एमाले) र नेपाली काँग्रेस पार्टी निकट उद्योगीहरुको संयुक्त प्यानलका अध्यक्षसहित धेरै पदमा निर्विरोध निर्वाचित भईरहँदा केही असन्तुष्ट उद्योगीहरु भने स्वतन्त्रको नारासहित मैदानमा उत्रेका छन् ।

शनिबार भएको मनोनयन दर्तामा एकल उम्मेदवारी परेपछि एमाले निकट सापकोटा अध्यक्षमा निर्विरोध निर्वाचित भएका छन् । सापकोटा सहित पदाधिकारी र सदस्य गरी १४ जना निर्विरोध निर्वाचित भएपनि अन्य पदमा भने निर्वाचन हुने भएको छ । एमाले र काँग्रेस उद्योगीहरुको संयुक्त प्यानलबाट द्वितीय उपाध्यक्षमा हरिबहादुर खत्री, कोषाध्यक्षमा युवराज आचार्य, सचिवमा सुमन बस्याल, सहकोषाध्यक्षमा विशाल बेल्बासेले उम्मेदवारी दिईरहँदा उद्योग संघलाई राजनीतिक हस्तक्षेपबाट मुक्त गराउने मुद्दा दिदै असन्तुष्ट भएका उद्योगीहरु स्वतन्त्र प्यानलको नारा दिदै महिला उद्यमी माया खनाललाई द्वितिय उपाध्यक्ष पदमा उम्मेदवार बनाउँदै प्रतिष्पर्धामा उत्रिएका छन् ।

पूर्व महिला सचिव समेत रहेकी खनाल उद्यागीहरुबीच लोकप्रिय नेतृ हुन । यो प्यानलबाट कोषाध्यक्ष पदमा फर्निचर उद्योगी सुरेन्द्र ज्ञवालीको उम्मेदवारी परेको छ । वर्तमान सह—कोषाध्यक्षको जिम्मेवारीमा रहेका उनले यसअघि दुई कार्यकाल कार्यसमिति सदस्यको भूमिका निभाएका थिए । ज्ञवाली २०६८ सालमा वस्तुगत समितिको सचिव र २०७० सालमा संयोजकको रुपमा काम गरिसकेका छन । यस्तै सचिवमा कमल ज्ञवाली र सह कोषाध्यक्षमा पे्रम बहादुर आलेको उम्मेदवारी परेको छ ।

खुल्ला सदस्यमा नेत्र बहादुर रुचाल, लाल बहादुर थापा, तुल बहादुर सारु, दिल बहादुर राना, मोहन भट्टराई, कृष्णप्रसाद पोखरेल, बल बहादुर गोदार र अशोक कुँवरको उम्मेदवारी परेको छ । यस्तै २ महिला सदस्यमा मिना थापा तुलाधर, शारदा भट्टराई र शारदा पहारीको उम्मेदवारी परेको छ । खत्री, आचार्य र बस्याल एमाले निकट हुन् भने बाँकी माओवादी, राष्ट्रिय स्वतन्त्र पार्टी र नेकपा एकीकृत समाजवादी निकट उद्योगीको प्यानलका हुन् । संघमा ८ जना खुल्ला सदस्यमा १५ जनाको उम्मेदवारी परेको छ । जसमा एमाले र काँग्रेस निकट उद्योगीहरुको प्यानलबाट ८ जना र माओवादी, राष्ट्रिय स्वतन्त्र पार्टी र नेकपा एकीकृत समाजवादी निकट उद्योगीको प्यानलबाट ५ जनाको उम्मेदवारी परेको छ ।

संघको वरिष्ठ उपाध्यक्षमा कृष्णप्रसाद पराजुली, प्रथम उपाध्यक्षमा जिवकान्त काफ्ले, महासचिवमा हिरामणि भट्टराई, महिला सचिवमा मन्जु भुसाल निर्वाचित भएका छन् । काफ्ले र भुसाल कांग्रेस निकट हुन् भने बांकी एमाले निकट हुन् । यस्तै एशोसिएट सदस्यमा प्रज्ज्वल थान्जु, आजीवन सदस्यमा माधवप्रसाद नेपाल, संस्थागत सदस्यमा गोबिन्दप्रसाद भुसाल, बुटवल औद्योगिक क्षेत्रबाट लालप्रसाद बस्याल, बुटवल उपमहानगर सदस्यमा लालहरि पाण्डे, तिलोत्तमा सदस्यमा रमेशप्रसाद आचार्य, सैनामैना नगरपालिका सदस्यमा नारायण ज्ञवाली र शुद्धोधन गाउंपालिका सदस्यमा टंकनारायण आचार्य निर्विरोध निर्वाचित भएका निर्वाचन प्रमुख यमलाल खनालले जानकारी दिए ।