खोज

नवलपुर, २७ असोज ।
पूर्वी नवलपरासीमा दशैको मुखमा ब्यापारीले उपभोग्य वस्तुको मूल्य वृद्धि गरेर बिक्री गर्दा समेत कहीँकतैबाट पनि कुनै चासो नदिंदा सर्वसाधारण मर्कामा परेका छन् ।

अहिले पूर्वी नवलपरासीमा दशैको मुुखमा बिगत दुुई महिना यताकै चरम मूल्यवृद्धि भएको छ । दैनिक खाद्य वस्तुमा भएको चरम मूल्यवृद्धिले उपभोक्ता देखि सर्वसाधारणको यो पटकको दशै निक्कै महँगो हुुने भएको उपभोक्ता मञ्च नवलपरासी पुर्वका सदस्य तिलक जैसीले बताए ।

अहिले पनि बिगत दुई महिनाको अवधिमा हरेक वस्तुको ४० प्रतिशत देखि ६० प्रतिशत सम्म मूल्य बृद्धि भएको छ । यो बिगत दश वर्षको तुलनामा चरम मूल्य वृद्धि भएको देवचुलीका निलकण्ठ पोखरेलको भनाई छ । अहिले पनि चिनीमा सबै भन्दा बढी कालाबजारी भैरहेको छ भने दाल, खाने तेल, मसला, चामल, प्याज, लसुुन लगायत दैनिक उपभोगका हरेक सामानमा चरम मूल्य वृद्धि भैरहेको गैंडाकोटका स्थानीय कान्ती कुँवरले बताईन् ।

अहिले बजारमा सोना मन्सुली चामलको प्रतिकिलो रु एक सय कायम भएको छ जुन दुई महिना अघि प्रतिकिलो रु ७६ कायम थियो । यसैगरी दुई महिना अघि प्रतिकिलो रु १४० पर्ने मसुरोको दाल अहिले रु २२० मा बिक्री भैरहेको छ भने चिनीको खुद्रा मूल्य प्रतिकिलो रु १३० मा उपभोक्ताले खरिद गरेर खान बाध्य भएका छन् । दाल, चिनी, मसला, तेल, चामल लगायत बिभिन्न खाद्य उपभोग्य वस्तुमा दशैंको मुखमा यसरी अचाक्ली मूल्य बढेका कारण कसैले पनि यसको नियन्त्रणमा चासो नदिंदा अझै मूल्य बढ्न सक्ने उपभोक्ताहरु बताउँछन् ।

यसरी हरेक चाडपर्वमा हुने कालाबजारी गर्नेहरुमाथि कारबाही गर्ने निकाय नै मौन रहँदा सबैभन्दा बढी मारमा सर्वसाधारणहरु पर्ने गरेका गैंडाकोटका अधिकारकर्मी एकदेव रिमालले बताए ।

अहिले बजारमा किनमेल गर्नेहरुले मूल्य वृद्धि हुँदा सबैलाई झस्काएको छ । प्रमुख जिल्ला अधिकारी कल्पना श्रेष्ठले अनुगमन आज आइतबारदेखि कडाईका साथ शुरु गरिने र लेवलिङ गरेको भन्दा बढी रकम लिएर उपभोग्य सामान बिक्री गरेको पाईएमा कारबाही गर्ने बताईन् ।

सहायक प्रमुख जिल्ला अधिकारीको नेतृत्वमा रहेको जिल्ला अनुगमन समितिले अनुगमन गर्ने गरे पनि त्यो प्रभावकारी बन्न सकेको छैन । प्रभाबकारी हुन नसकिरहेको अवस्थामा भने आजदेखि थप कडाईका साथ अनुगमन गर्ने र कृत्रिम अभाव देखाउने, मूल्य वृद्धि गराउने जो कसैलाई पनि कारबाहीको दायरामा ल्याउने प्रमुख जिल्ला अधिकारी श्रेष्ठले बताईन् ।

मूल्य वृद्धिले हरेक निम्न आय भएका सर्वसाधारणको ढाड सेकिएको छ । “महँगोमा तिरेर भए पनि पेट भर्नका लागि सामान किन्न पर्दो रहेछ”– गैंडाकोटका रविन्द्र अधिकारीले भने । हरेक सामानको मूल्यमा भएको वृद्धिलाई रोक्न सम्बन्धित निकाय असफल भएको उनले बताए ।

मूल्य वृद्धि भएको तर्फ जिल्ला प्रशासनको गम्भीर ध्यानाकर्षण भएको र प्रशासनका तर्फबाट कडाईका साथ अनुगमन गरी सर्वसाधारण ठग्ने जो कसैलाई पनि कारबाही गरिने प्रमुख जिल्ला अधिकारी श्रेष्ठले बताईन् ।