खोज

लमही, २५ असोज ।

लुम्बिनी प्रदेशका मुख्यमन्त्री डिल्ली बहादुर चौधरीले संघीयता प्रतिको जनताको निराशा हटाउने गरी सरकारले काम गर्नु पर्ने बताएका छन् । उनले तीनै तहका सरकारले पूर्ण अधिकार प्रयोग गरी जनता प्रतिको विश्वास बढाउनु पर्ने र संघीयता प्रति बढेको निराशा कम गराइ संघीयता र संविधान प्रतिको विश्वास बढाउनु पर्ने बताए । “अधिकार सबैले प्रयोग गरौ, जनताको विश्वास हराउन दिनु हुँदैन”, उनले भने, “संघीयतामा विकास, नेतृत्वमा प्रतिस्पर्धा गरौ र जनताको पहँुच बढाउँ । तर आलोचना र चुनौतीमा मात्रै अलमल नगरौ ।”

बिहीबार लुम्बिनीमा भएको संघीयता कार्यान्वयन्मा योजना तर्जुमा र विकास व्यबस्थापन सम्बन्धी अन्तर प्रदेश अनुभव आदान प्रदान कार्यक्रमलाई सम्बोधन गर्दै चौधरीले यस्तो बताएका हुन् ।

उनले संघीयता र संविधान कार्यान्वयनको चुनौती रहेको भन्दै यसको औचित्य पुष्टि गर्नु पर्ने बताए । मुख्यमन्त्रीले संघीयता फेल भयो भने संबिधान पनि फेल हुने हुँदा यो चुनौती सबै मिलेर सामना गर्नु पर्ने बताए ।

लुम्बिनीका पुर्व मुख्यमन्त्री लिला गिरीले संघीयता कार्यान्वयनका लागि सबैले नियत सफा राखेर काम गर्नु पर्ने बताए । मधेश प्रदेशका पुर्व मुख्यमन्त्री लालबाबु यादबले केन्द्रले संघीयताप्रति राख्ने दृष्टीकोण फरक रहेको बताए ।

नीति निर्माण गर्दा र योजना निर्माणमा साझा सवाल जोड्न र अनुभव आदानप्रदान गर्न कार्यक्रमको आयोजना गरिएको लुम्बिनी प्रदेशका योजना आयोगका उपाध्यक्ष डा. नहकुल केसीले बताए । लुम्बिनी प्रदेशका प्रमुख सचिव राधिका अर्यालले संघीयताको मर्म सहकार्य, समन्वय र सहअस्तित्व कायम गर्ने रहेको बताइन् ।
कार्यक्रममा सातै प्रदेशका योजना आयोगका उपाध्यक्ष, सदस्य लगायतको सहभागिता रहेको छ ।