खोज

बुटवल, ९ भदौ ।

नेपाल निजामती कर्मचारी संगठन मायादेवी गाउँपालिकाको पालिका समितिमा शारदा मरासिनीको अध्यक्षतामा ११ सदस्यीय नयां नेतृत्व चयन भएको छ ।

जसको उपाध्यक्षमा प्रदिप पण्डित, महिला उपाध्यक्षमा रिता ज्ञवाली, सचिवमा खुमराज गैरे, कोषाध्यक्षमा सिता आचार्य रहेका छन् । त्यस्तै सदस्यहरुमा विजय अर्याल, मञ्जु कुमाल, सरिता पौडेल, जितेन्द्र हरिजन र शान्ता पोख्रेल निर्विरोध निर्वाचित भएको नेपाल निजामती कर्मचारी संगठन रुपन्देहीका अध्यक्ष प्रेम प्रसाद खनालले जानकारी दिए ।

सम्पूर्ण निर्वाचितहरुलाई नेपाल निजामती कर्मचारी संगठनका केन्द्रीय सचिवालय सदस्य दिपक शर्मा पौडेलले पद तथा गोपनियताको सपथग्रहण गराएका थिए ।

त्यस अवसरमा बोल्दै केन्द्रीय सचिवालय सदस्य पौडेलले कर्मचारीको क्षमता विकासको लागि स्थानीय सरकारसँग सामूहिक सौदावाजी गर्ने केन्द्रीय टिम भएको बताउँदै कर्मचारीको हकहितका साथै सेवा प्रवाहमा समेत संगठनले सधै अग्रपंक्तिमा रहेर काम गर्ने बताए ।

संगठनका केन्द्रीय सदस्य एवं रुपन्देही ईन्चार्ज नारायण प्रसाद भण्डारीले संगठनको ईतिहासदेखि हालसम्मका गतिविधिका सम्बन्धमा चर्चा गर्दै यो संगठन सवै सेवा समूह र सवै तहका सवैखाले कर्मचारीहरुको माउ संगठनका रुपमा स्थापित भएकोले सवैको असल अभिभावकको भूमिका निर्वाह गर्न सक्ने संगठनको रुपमा स्थापित होस् भन्दै शुभकामना दिए ।

कार्यक्रममा नेपाल निजामती कर्मचारी संगठन रुपन्देहीका अध्यक्ष प्रेम प्रसाद खनालले संगठनले सेवा प्रवाहलाई थप चुस्त दुरुस्त बनाउँदै कर्मचारीको हक र हितको लागि कानून सम्मत तरिकाले सामूहिक सौदावाजी गर्न उल्लेख्य भूमिका खेलोस् भन्दै निर्वाचित पदाधिकारी तथा सदस्यहरुलाई सफल कार्यकालको शुभकामना व्यक्त गरे ।

नव निर्वाचित पालिका समितिका अध्यक्ष शारदा मरासिनीले सेवा प्रवाहलाई चुस्तदुरुस्त पार्दै कर्मचारी हकहितमा सदैव लाग्ने प्रतिवद्धता व्यक्त गरेका थिए भने संगठनका जिल्ला सल्लाहकार भास्कर आत्रेय र पेशागत महासंघ लुम्विनी प्रदेश कमिटीका अध्यक्ष शिव पौडैलले सहजीकरण गर्दै मायादेवी गाउँपालिकामा कर्मचारी हकहितको लागि अभिभावकत्व लिन सक्ने संगठन निर्माण भएकोमा खुशि व्यक्त गरेका थिए ।

कार्यक्रममा संगठन रुपन्देहीका सचिव जीवन पौडेल, कोषाध्य पदम थापा, मायादेवी गाउँपालिका वडा नं. ८ का अध्यक्ष चोक बहादुर थापा, शंकर ज्ञवाली, लाला लोध लगायतले निर्वाचित पालिका समितिको सफल कार्यकालको शुभकामना व्यक्त गरेका थिए ।