खोज

कपिलवस्तु, ४ भदौ ।

नेकपा (एमाले) का पोलिटब्युरो सदस्य एवम् कपिलवस्तु इन्चार्ज खिमलाल भट्टराईले आवश्यकता र औचित्यताका आधारमा लुम्बिनी प्रदेशको मूल नेतृत्व चयन गर्ने बताएका छन् । युवा नेता भट्टराईले यही भाद्र १६ र १७ गते बुटवलमा सम्पन्न हुने नेकपा (एमाले) लुम्बिनी प्रदेशको प्रथम अधिवेशनबाट नेतृत्व सर्वसम्मत ढंगबाट चयन गर्ने स्पष्ट पार्दै अधिवेशनबाट ४० वर्ष मुनिका युवा पुस्ताको कमिटीगत जिम्मेवारी सुनिश्चित गरिने बताए ।

पार्टी अध्यक्ष केपी शर्मा ओलीले उद्घाटन गर्ने लुम्बिनी प्रदेशको अधिवेशन पहिलो भएको हँुदा अधिवेशनबाट देशलाई नै पार्टीले सन्देश दिने दावी गरे । नेता भट्टराईले नेकपा (एमाले) कपिलवस्तुको जिल्ला सचिवालय वैठकलाई सोमबार मदनआश्रित स्मृति भवन तौलिहवामा सम्बोधन गर्दै यस्तो बताएका हुन् ।

वैठकमा नेकपा (एमाले) का केन्द्रीय सदस्य एवम् कपिलवस्तु प्रितिनिधिसभा निर्वाचन क्षेत्र नं. १ का सदस्य बलराम अधिकारीले अनुशासित कार्यकर्ताबाट मात्र सुदृढ संगठन संभव रहने बताए । सासंद अधिकारीले जनताको बीचमा काम गर्न कार्यकर्तालाई आग्रह गर्दै जनताको बीचमा काम गर्नेहरु नै स्थापित हुने जिकिर गरे ।

वैठकले लुम्बिनी प्रदेश अधिवेशनको प्रतिनिधि छनोट कार्यका लागि पालिकास्तरमा निर्वाचन समिति गठन गर्नुका साथै निर्वाचन केन्द्र समेत तोकिदिएको जिल्ला निर्वाचन विभागका प्रमुख बिश्व कार्कीले जानकारी दिए ।

प्रदेश अधिवेशनमा कपिलवस्तु जिल्लाबाट उत्साहजनक जनसहभागिता गराउने निर्णय गरेको जिल्ला अध्यक्ष डम्मर शर्माले बताए । अध्यक्ष शर्माले सर्वसम्मत ढंगबाट प्रतिनिधि चयनका निम्ति कोशिस गर्ने स्पष्ट पारे ।

वैठकले लुम्बिनी प्रदेशको प्रथम अधिवेशनका निम्ति निर्वाचन कार्यतालिका पारित गरेको छ । निर्वाचन तालिका अनुसार भाद्र ७ गते मतदाता नामावली प्रकाशन, भाद्र ८ गते उम्मेद्वारको मनोनयन दर्ता, अन्तिम नामावली प्रकाशन गर्ने र सहमति नभएमा भने भाद्र ९ गते विहान ८ः०० बजे देखि मतदानको प्रक्रिया थालनी गर्ने छ ।

लुम्बिनी प्रदेश अधिवेशनका लागि कपिलवस्तु जिल्लाबाट ७० जनाप्रतिनिधि छनौट हुने जिल्ला सचिव सिवि गहतराजले जानकारी दिए । जिल्ला सचिवालय वैठकले भूमिअधिकार तथा श्रमिक संगठन लुम्बिनी प्रदेशको भाद्र २७ गते जिल्लाको शिवराजमा हुने अधिवेशनलाई भब्य रुपमा सम्पन्न बनाउनका निम्ति जिल्ला पार्टीबाट विशेष भूमिका खेल्ने निर्णय गरेको एमाले नेता हिरालाल पौडेलले बताए ।