खोज

नेपालगञ्ज, ३० साउन ।

नेपालगञ्जको धम्बोझी (विरेन्द्र) चोकमा स्वर्गीय राजा वीरेन्द्रको शालिक पुनस्र्थापना गर्न दोस्रो चरणको कार्यक्रम सुरु भएको छ । करिव एक महिना अघिदेखि शालिक पुनस्र्थापना गर्ने अभियान थालेको ‘स्वार्गीय राजा वीरेन्द्रकोे शालिक पुनस्र्थापना समिति नेपालगन्ज बाँके’ ले मंगलबार नेपालगन्जमा पत्रकार सम्मेलन गरेर दोस्रो चरणको कार्यक्रमको बारेमा जानकारी दिएको हो ।

समितिका केन्द्रीय संयोजक तेजविक्रम शाहले दोस्रो कार्यक्रम अन्तर्गत शालिक पुनस्र्थापनाका लागि समर्थन जुटाउन जिल्लास्थित राजनीतिक दलहरुसँग सर्वदलीय बैठक बस्ने बताएका छन् । उनका अनुसार दोस्रो कार्यक्रममा नेपालगन्ज उप–महानगपालिकाका २३ वटै वडाहरुमा नेपालगन्जको वीरेन्द्र चोकमा स्वर्गीय राजा वीरेन्द्रको शालिक पुनस्र्थापना सहयोग समर्थन जुटाउनको लागि वडा संयोजकको संयोजकत्वमा प्रत्येक वडामा १ सय ५१ सदस्यहरुको ऐक्यबद्धता समूह गठन गरिने छ ।

‘मातृभूमि नवनिर्माण अभियान नेपाल’ तथा ‘स्वर्गीय राजा वीरेन्द्रको शालिक पुनस्र्थापना समिति’ ले एक महिनाअघि वीरेन्द्रचोकमा पत्रकार सम्मेलन गरेर अभियान सुरुभएको जनाएको थियो । त्यसपछि समितिले हताक्षर अभियान संकलन सुरु गरेको थियो भने जिल्लास्थित विभिन्न राजनीतिक दलहरुलाई विरेन्द्र चोकमा शालिक पुनस्र्थापनाका लागि सहयोग गर्न आग्रह सहितको पत्र हस्तान्तण गरेको संयोजक शाहले बताए ।

२०६२÷०६३ को जनआन्दोलनका क्रममा देशका विभिन्न स्थानमा रहेका राजाको शालिक भत्काईएको थियो । नेपालगञ्जको त्रिभुवन चोकमा राजेन्द्र लिङ्देन नेतृत्वमा राप्रपा निकट कार्यकर्ता तथा देशभक्त युवाहरूले यसअघि २०७८ फागुन ७ गते प्रजातन्त्र दिवस पारेर स्वर्गीय राजा त्रिभुवनको अर्धकदको शालिक पुनस्र्थापना गर्न सफल भएका छन् ।

नेपालगन्जको पुरानो वीरेन्द्रचोक र अहिलेको धम्बोजी चोकमा बिगतमा पनि दुई पटक राजा विरेन्द्रको शालिक राख्ने क्रममा विवाद भएको थियो । गतबर्ष २०७९ जेठ १९ गते राप्रपाका कार्यकर्ताले शालिक राखे लगत्तै अन्य राजनीतिक दल तथा समुदायका मानिसले तीब्र विरोध जनाउन थालेपछि प्रहरीले शालिक राखेको केही बेरमै हटाएको थियो । राप्रपाका कार्यकर्ताहरु राजनीतिक परिवर्तनका नाममा इतिहास मेटाउन नहुने बताउँदै आएका छन् ।