खोज

पाल्पा, २० साउन ।

बरिष्ठ मुटुरोग विशेषज्ञ एवं नेपाल मेडिकल काउन्सिलका अध्यक्ष डा. भगवान कोईरालालाई औषधी व्यवसायी संघ पाल्पाले औषधी व्यवसायी संगम सम्मान र पुरस्कारबाट सम्मानित गरेको छ । डा. कोईरालाई नगद १० हजार सहित पाल्पाली ढाका, दोसल्ला, टोपी र सम्मानपत्रबाट सांसदद्वय ठाकुर प्रसाद गैरे, नारायण प्रसाद आचार्य, प्रदेश सांसदद्वय विरबहादुर राना, खेम बहादुर सारु र संघका अध्यक्ष विष्णु केसीले सम्मानित गरेका छन् । सोही अवसरमा संघले अक्षयकोषदाता रुकमागत शर्मालाई पनि सम्मानित गरेको छ ।

डा. कोईरालाले औषधी पसलबाट जथाभावी रुपमा एन्टिवायोटिक प्रयोग बढ्नाले नेपालीको स्वास्थ्य अवस्था जटिल बन्दै गएको बताएका छन् । डा. कोईरालाले पहिलो र दोस्रो किसिमको एन्टिवायोटिकले काम नगर्ने, तेस्रो किसिमको एन्टिवायोटिक महङ्गो, भनेको समयमा नपाइने अवस्था रहेकोले धेरै नेपालीको स्वास्थ्य जटिल बन्दै गएको बताए ।

कार्यक्रममा प्रतिनिधिसभा सदस्य ठाकुर प्रसाद गैरेले राज्यको नीति नियम, कानुन सवैले मान्नुपर्ने बताएका छन् । राज्य भन्दा माथि न त सरकार छ, न त संघ संस्था छन्, न त कुनै व्यक्ति छन् त्यसैले राज्यले बनाएको नीति नियम, कानुन सबै पक्षले पालना गर्नु पर्ने सांसद गैरेले बताए ।

सांसद गैरेले पाल्पाका दुई ठूला अस्पताल प्रति लक्षित गर्दै राज्यसँग सम्झौता गर्ने, केही समस्याहरु आए भन्दैमा बीचमै छोड्छु भनेर सेवा प्रवाह नै रोक्नु गैर जिम्मेवारी काम भएको सांसद गैरेले बताए । कार्यक्रममा प्रतिनिधिसभा सदस्य नारायण प्रसाद आचार्य, प्रदेश सांसद विरबहादुर राना, सहायक प्रमुख जिल्ला अधिकारी भक्तिसरा राना, निवर्तमान केन्द्रीय अध्यक्ष बाबुराम भट्टराई, लुम्विनी प्रदेश अध्यक्ष शिव ज्ञवाली, पाल्पा उद्योग वाणिज्य संघका अध्यक्ष शैलेन्द्र भट्टराई, पाल्पा व्यापार संघका अध्यक्ष बामदेव बस्यालले सातौ साधारणसभाको शुभकामना दिदै औषधी व्यबसायीहरुले खेलेको भूमिकाबारे चर्चा गरे ।