खोज

बुटवल । लुम्बिनी प्रदेश सभा सदस्य कृष्णा केसीले पनि प्रदेश सभा सदस्य पदबाट राजीनामा दिएकी छिन् । प्रदेश सभा सचिवालयले प्रकाशित गरेको सूचनाअनुसार नेपाल कम्युनिष्ट पार्टीकी सांसद केसीले प्रदेश सभा सदस्यबाट राजीनामा दिएकी हुन् ।

उनी प्रदेश सभा निर्वाचनमा प्रत्यक्षतर्फ चुनाब जित्ने एक्ली उम्मेदवार हुन् । उनी बाँके १(१) बाट प्रत्यक्ष निर्वाचित भएकी थिइन् । तत्कालीन कांग्रेस र माओवादी केन्द्रसहितको सत्ता गठबन्धनकी साझा उम्मेदवार केसीले नागरिक उन्मुक्ति पार्टीका सोमराज चौधरीलाई पराजित गरेकी थिइन् ।

केसीले ९ हजार १०३ मत पाउँदा चौधरीले सात हजार ९६६ मत पाएका थिए । केसी २०७४ मा पनि सोही क्षेत्रबाट प्रत्यक्षमा निर्वाचित भएकी थिइन् । माओवादीको विद्यार्थी संगठन, महिला संगठन हुँदै बाँके जिल्ला सचिव र केन्द्रीय सदस्य समेत भएकी केसी ०५४ चैतमा जेल परी ०५६ वैशाखमा छुटेकी थिइन् ।

उनीसहित नेपाली कम्युनिस्ट पार्टी (नेकपा)का धनबहादुर मास्की, नेकपामा समाहित भएको नागरिक उन्मुक्ति पार्टी (नाउपा)का सांसद धर्मबहादुर चौधरी र लोकतान्त्रिक समाजवादी पार्टीका कन्हैया बानियाले राजीनामा बुझाएको प्रदेश सभा सचिवालयले जनाएको छ ।

चारै जना सांसदले माघ ४ गते प्रदेश सभा सदस्य पदबाट राजीनामा दिएको ब्यहोरासहितको पत्र सभामुखलाई बुझाएको भन्दै प्रदेश सभा सचिवालयले सूचना प्रकाशन गरेको हो ।
लुम्बिनी प्रदेश सभाका सचिव दुर्लभकुमार पुनले चार जना सांसदले बुझाएको राजीनामाको सूचना प्रकाशित गरिएको बताए ।

चार जना सांसद प्रतिनिधि सभा सदस्यको निर्वाचनमा उम्मेदवार बन्नका लागि प्रदेश सभा सदस्यबाट राजीनामा दिएका हुन् । उनीहरुमध्ये चौधरी र बानियाँले पार्टीसमेत परित्याग गरेका छन् । चौधरी नागरिक उन्मुक्ति पार्टी नेपाली कम्युनिष्ट पार्टीमा समाहित भएपछि कुलमान घिसिङ नेतृत्वको उज्यालो नेपाल पार्टीमा महासचिव बनेका छन् । बर्दिया २ (२) बाट प्रदेश सभामा निर्वाचित भएका उनले बर्दिया २ बाट उम्मेदवारी दिदै छन् ।

रुपन्देही ४ (१) बाट प्रदेश सभा सदस्य निर्वाचित बानियाँ राष्ट्रिय स्वतन्त्र पार्टी प्रवेश गरेर रुपन्देही ४ बाट प्रतिनिधि सभा सदस्यमा उम्मेदवारी दिदै छन् । दाङ ३ (२) बाट निर्वाचित भएका मास्की दाङ निर्वाचन क्षेत्र नं. ३ बाट नेपाली कम्युनिष्ट पार्टीको उम्मेदवार बन्दैछन् । ८७ सदस्य रहेको लुम्बिनी प्रदेशसभामा ४ जनाको राजीनामापछि प्रदेश सभा ८३ सदस्यीय भएको छ ।