खोज

 काठमाडौं ।

पोखरा क्षेत्रीय अन्तर्राष्ट्रिय विमानस्थलमा अत्याधुनिक हवाई इन्धन डिपो सञ्चालनमा आएको छ। नेपाल आयल निगमले करिब ७५ करोड रुपैयाँको लागतमा विमानस्थल परिसरमै निर्माण गरेको यो डिपो आजदेखि सञ्चालनमा आएको हो।

नेपालको ५५ वर्ष लामो इन्धन आपूर्ति इतिहासमा पहिलो पटक पूर्ण रूपमा स्वदेशी परामर्शदाता, निर्माण व्यवसायी र आन्तरिक स्रोतको प्रयोग गरी यस्तो सुविधा सम्पन्न डिपो निर्माण गरिएको निगमले जनाएको छ। नागरिक उड्डयन प्राधिकरणले विमानस्थल सञ्चालनमा ल्याएसँगै इन्धन डिपोको आवश्यकता देखिँदा प्रक्रिया अघि बढाइएको थियो।

डिपो निर्माणका लागि नागरिक उड्डयन प्राधिकरणबाट ९ हजार २ सय १५ वर्गमिटर क्षेत्रफल लिजमा लिएर काम सुरु गरिएको हो। सार्वजनिक खरिद ऐनअनुसार २०७७ चैत २ मा बोलपत्र आह्वान गरिएपछि आवश्यक प्रक्रिया पूरा गरी २०७९ पुस १५ मा जग्गा भाडा सम्झौता भएको थियो। त्यसपछि २०८० साउन १ मा शिलान्यास गरिएको डिपो हाल पूर्णरूपमा तयार भएको हो।

उक्त डिपोमा तीनवटा भव्य भण्डारण गृह निर्माण गरिएको छ, जसले ३ हजार ६ सय किलोलिटरसम्म हवाई इन्धन भण्डारण गर्न सक्छ। प्रत्येक भण्डारण ट्यांकको उचाइ र व्यास १२ मिटरको छ। अत्यधिक संवेदनशील र प्रज्वलनशील इन्धनको सुरक्षालाई ध्यानमा राख्दै एक हजार २ सय किलोलिटर क्षमताको पानी ट्यांकीसहित फायर फाइटिङ प्रणाली जडान गरिएको छ।

फायर फाइटिङका लागि दुईवटा २३० हर्सपावर क्षमताका डिजेल पम्प, एउटा १५ हर्सपावर क्षमताको जक्की पम्प र ८ इन्चको पाइप जडान गरिएको छ। साथै, आकस्मिक आगलागी नियन्त्रणका लागि चार हजार लिटर क्षमताको फोम स्टोरेज ट्यांक पनि स्थापना गरिएको छ, जसले पानीसँग मिसिएर आगो निभाउने कार्यमा सहयोग पुर्‍याउनेछ।

डिपोमा रिफ्युलिङ र भण्डारण प्रणालीको गुणस्तर सुनिश्चित गर्न १ माइक्रोन र ५ माइक्रोनका फिल्टर जडान गरिएका छन्। त्यस्तै, अमेरिकन पेट्रोलियम इन्स्टिच्युट (एपीआई) को मापदण्डअनुसारका स्टोरेज ट्यांक र फलामका पाइप प्रयोग गरिएको निगमले जनाएको छ।यो डिपो सञ्चालनमा आएपछि पोखराबाट हुने राष्ट्रिय तथा अन्तर्राष्ट्रिय उडानहरूलाई हवाई इन्धन आपूर्ति सहज र सुरक्षित हुने विश्वास लिइएको छ।