खोज

कपिलवस्तु, १७ असार ।

कपिलवस्तु नगरपालिकाका १ सय ५ जना नागरिकले मुटु रोगको निःशुल्क उपचार पाएका छन् । कपिलवस्तु नगरपालिका वडा नम्बर १ को आर्थिक सहयोग र सरिम हस्पिटल प्रा.लि.को प्राविधिक सहयोगमा सनलाईट सामाजिक विकास केन्द्र कपिलवस्तु न.पा. ८ ले हस्पिटलमा आयोजना गरेको एक दिने मुटु सम्बन्धी स्वास्थ्य शिविरमा सो सङ्ख्याका बिरामीले उपचार सेवा लिएका हुन । शिविरमा बिरामीहरूलाई निःशुल्क परीक्षण, मुटु रोग उपचार बारे परामर्श, प्रयोगशाला, ईसिजी, ईको र आवश्यकता अनुसारको औषधी निःशुल्क उपलब्ध गराइएको हो ।

शिविरमा उपचारका लागी आएका कपिलवस्तु नगरपालिका १ का बिरामी मोहम्मद रियाजले आफुहरूले बुटवल पुगेर सशुल्क लिने उपचार सेवा टोल छिमेकमै शिविर मार्फत पाएकोमा खुसी लागेको बताए । सोही वडाकी हबिबुन निसाले आफूलाई मुटु, रक्तचाप, मधुमेह, हात झम्झमाउने समस्या रहेकोले उपचारका लागी अन्यत्र जानु पर्ने बाध्यता रहने गरेको बताइन ।
आफ्नै गाउँ ठाउँमा निःशुल्क उपचार सेवा पाउँदा सुखी लागेको उनको भनाई थियो । निःशुल्क मुटु स्वास्थ्य शिविरमा १ सय ५ जनाको स्वास्थ्य परीक्षण गरिएकोमा ७९ जनाले ईको र ईसिजी सेवा, ४३ जनाले प्रयोगशाला सेवा र ८४ जनालाई आवश्यक औषधी वितरण गरिएको सरिम हस्पिटल प्रा.लिका सञ्चालक डाक्टर जाबेद अहमदले जानकारी दिए । शिविरमा ६ जना नयाँ मुटु रोगी फेला परेको उनले स्पष्ट पारे ।

शिविरमा गौतमबुद्ध मुटु अस्पताल बुटवलमा कार्यरत मुटु रोग विशेषज्ञ डाक्टर मजहर खान नेतृत्वको स्वास्थ्यकर्मीहरूको टोलीले उपचारको सेवा दिएको थियो । टोलीमा थप दुई मेडिकल अधिकृतहरू डाक्टर खगेश्वर साह र डाक्टर रत्नेश्वर यादव सहितको स्वास्थ्यकर्मी उपचारमा खटिएका थिए । शिविरका मुटु सम्बन्धी समस्याको रूपमा रहेको हर्ट अट्याक, मुटुको भल्बको समस्या, श्वासप्रश्वास सम्बन्धी, रक्तचाप, मधुमेह र चिन्ता लगायतका समस्याका बिरामी उपचारका लागी आएको मुटु रोग विशेषज्ञ डाक्टर मजहर खानले बताए ।

बिरामीलाई मुटु रोगको समयमै उपचार गर्न तथा समयमै लक्षण पहिचान गरी सावधानी अपनाउन सचेत बनाउनका लागी शिविरले सहयोग गरेको सनलाईट सामाजिक विकास केन्द्रका तर्फबाट व्यवस्थापनको भूमिका निर्वाह गरेका मोहम्मद ईरफान मन्सुरीले जानकारी दिए । गरिब र बिपन्न नागरिकलाई शिविर आयोजनाले ठुलो राहत मिलेको उनको भनाई थियो ।
पछिल्लो समय खानपान, व्यायामको व्यवस्थापन नहुँदा मुटु रोगीको सङ्ख्या बढ्दै गएको अवस्थामा वडा र नगरवासीलाई निःशुल्क मुटु रोगको उपचार र सहजताका लागी शिविरको आयोजनामा सहयोग गरिएको कपिलवस्तु नगरपालिका वडा नम्बर १ का अध्यक्ष मोहम्मद जाहिद खाँले बताए । उनले नागरिकको आवश्यकताका आधारमा आगामी दिनमा पनि स्वास्थ्य सेवा प्रदान गर्न वडा कार्यालय सदैव तत्पर रहेको जनाए ।