काठमाडौं।
प्रतिनिधिसभा अन्तर्गतको शिक्षा, विज्ञान तथा प्रविधि समितिको बैठक आज दिउँसो ४ बजेपछि मात्रै सुरु भएको छ। बैठक बिहान साढे ८ बजेका लागि बोलाइएको भए पनि विद्यालय शिक्षा विधेयकमा सहमति नजुट्दा लामो समयसम्म बैठक सुरु हुन सकेन।
असार १५ को समयसीमा तोक्दै नेपाल शिक्षक महासंघले सडक संघर्ष रोक्ने निर्णय गरेको थियो। तर अन्तिम घडीमा पनि विधेयकका मुख्य प्रावधानमा सहमति नजुटेपछि विषय पेचिलो बन्दै गएको छ।
यसै सन्दर्भमा शिक्षक महासंघका नेताहरू आइतबार बिहानै सिंहदरबार पुगेका थिए। विधेयक हिजै समितिबाट पारित हुने अपेक्षा थियो, तर केही संवेदनशील बुँदामा सहमति नबन्दा प्रक्रियामा ढिलाइ भएको हो।
विधेयक पारित गराउन दबाब दिन शिक्षक महासंघले दबाबमूलक गतिविधि थालेपछि शिक्षामन्त्री रघुजी पन्तले नेपाली कांग्रेसका सभापति शेरबहादुर देउवालाई भेटेर समर्थन मागेका थिए।
बैठकका लागि बिहानैदेखि सांसदहरू उपस्थित भए पनि, शिक्षक पदपूर्तिको प्रतिस्पर्धा मोडेल (६०/४० आन्तरिक/खुला) सम्बन्धमा मन्त्रालय र महासंघबीच अहिलेसम्म सहमति जुट्न सकेको छैन।
महासंघले ६०% आन्तरिक र ४०% खुला प्रतिस्पर्धा को प्रस्ताव राखेको भए पनि, मन्त्रालयले यसबारे अलग अडान लिएपछि वार्ता भङ्ग भएको थियो। हाल विधेयक संसदमा प्रस्तुत गर्ने प्रक्रिया अन्योलमै रहेको छ। सहमति जुट्ने सम्भावना कायमै भए पनि, समयसीमा नाघ्दै जाँदा शिक्षा नीति निर्माणको गति फेरि अलमलिने संकेत देखिएको छ।
