काठमाडौं ।
नेपाल दूरसञ्चार प्राधिकरणमार्फत टेरामक्स प्रविधि खरिदमा भएको भनिएको भ्रष्टाचार प्रकरणमा मुछिएका पूर्वसञ्चार तथा सूचना प्रविधिमन्त्री मोहनबहादुर बस्नेत आज विशेष अदालतमा उपस्थित भएका छन्।
बस्नेतले अदालतमा उपस्थित हुन पाउन विशेष निवेदन दिएका थिए। त्यसपछि विशेष अदालतका न्यायाधीश तेजनारायण सिंह राई, रामबहादुर थापा र विदुर कोइरालाको इजलासमा उनको बयान लिइँदैछ।
बयान प्रक्रिया सम्पन्न भएपछि आजै थुनछेक बहससमेत गर्ने तयारी अदालतले गरेको छ। बस्नेत सञ्चारमन्त्री रहेका बेला टेरामक्स प्रविधि खरिद सम्बन्धी निर्णय गरिएको थियो। सोही निर्णयलाई लिएर उनलाई भ्रष्टाचार मुद्दा लगाइएको हो। मुद्दा दायर भएलगत्तै उनी सांसद पदबाट निलम्बनमा परेका छन्।
