खोज

कृष्णनगर, १५ असार ।
कपिलवस्तुमा नेपाली काँग्रेसले निर्वाचन क्षेत्र नम्बर ३ मा नेपाली काँग्रेसको तर्फबाट भएका लुम्बिनी प्रदेश सरकार र सङ्घ सरकारका मन्त्रीहरूलाई बहिष्कार गर्ने निर्णय गरेको छ ।  शनिबार नेपाली काँग्रेस कृष्णनगर नगर समितिले यस्तो निर्णय गरेको छ । प्रदेश र सङ्घ सरकारले आर्थिक वर्ष २०८२/०८३ का लागि बजेट विनियोजन गर्दा कृष्णनगर नगरपालिका लगायत सम्पूर्ण क्षेत्र नम्बर ३ को प्रदेश सभा (१) र (२) क्षेत्रसमेत बेवास्ता गरेको भन्दै मन्त्रीहररुलाई बहिष्कार गरेको नेपाली काँग्रेस कृष्णगर नगर समितिका सभापति विनय गिरीले जनाए ।

सरकारले बजेट बाँडफाँड गर्दा पूर्ण रूपमा विभेद, अवहेलना गरेको नेपाल काँग्रेस कृष्णनगर नगर समितिको ठहर छ । यस क्षेत्रमा तीन ओटै पालिकाहरू मध्ये कृष्णनगर नगरपालिकामा मात्र नेपाली काँग्रेसको प्रतिनिधित्व भए पनि प्रदेश मन्त्रीहरूले बजेट विनियोजनमा बेवास्ता गरेको हुँदा अब आउने दिनहरूमा ती मन्त्रीहरूलाई यस पालिकामा पार्टीको कुनै पनि कार्यक्रममा निषेध गरिएको जनाइएको छ । यस्तै कुनै स्वागत, सम्मान नगरि बहिष्कार गर्ने निर्णयसमेत पार्टीले गरेको छ ।

यसैगरी नेपाल काँग्रेसले बन तथा भु–संरक्षण राज्य मन्त्री रूप विकालाई समेत बहिष्कार गर्ने निर्णय गरेको छ । क्षेत्र नम्बर ३ को समानुपातिकतर्फबाट विक सांसद भई मन्त्री समेत भएर पनि यस क्षेत्रमा नेपाली काँग्रेसको माग अनुसार बजेट विनियोजन नगराएको हुँदा बहिष्कार गरिएको हो । उनलाई पनि कुनै स्वागत, सम्मान नगर्ने र आउने दिनमा यस क्षेत्रमा कुनै पनि कार्यक्रममा सहभागी नगराउनुको साथै निषेध गरिएको पार्टीले जनाएको छ ।

नेपाली काँग्रेसको बैठकमा जिल्ला सभापति अब्दुल कलाम, महासमिति सदस्य बिरेन्द्र कुमार कनोडिया, क्षेत्रीय सभापति ब्रम्हानन्द उपाध्याय, महासमिति सदस्य दिपक शुक्ल, ३ (२) का क्षेत्रीय सभापति मुक्तेश्वर मिश्र, महासमिति सदस्य अकिल मियाँ, महाधिवेशन प्रतिनिधि घनश्याम बनिया लगायतको उपस्थिति थियोे ।