खोज

काठमाडौँ ।
सावधान ! सामाजिक सञ्जालमा देखिने आकर्षक विज्ञापनको प्रलोभनमा परेर अपरिचित लिंक क्लिक गर्दा तपाईंको बैंक खाता रित्तिन सक्छ । यस्तै ठगीमा संलग्न एक गिरोहका तीन जना ‘स्क्यामर’लाई नेपाल प्रहरीको साइबर ब्युरोले पक्राउ गरेको छ ।

पक्राउ पर्नेमा सिन्धुपाल्चोक चौतारा साँगाचोकगढी नगरपालिका–११ का ४० वर्षीय राजन गिरी, ओखलढुंगा चम्पादेवी गाउँपालिका–८ घर भई हाल काठमाडौँ बुढानिलकण्ठ बस्ने २६ वर्षीया मिना लकन्द्री र भारत बिहारका २६ वर्षीय आदित्य कुमार रहेका छन् ।

ब्युरोका अनुसार, उक्त गिरोहले सामाजिक सञ्जाल फेसबुकमा विभिन्न बैंकको नाममा ‘सर्भे लिंकमा क्लिक गरी बोनस प्राप्त गर्नुहोस्’ भन्ने आकर्षक विज्ञापन पोस्ट गर्ने गरेको थियो । उक्त लिंकमा क्लिक गरेपछि प्रयोगकर्ताको बैंक खाताबाट रकम अनलाइनमार्फत अन्य खातामा ट्रान्सफर भई ठगी हुने गरेको थियो ।

यसरी ठगिएका पीडितहरूबाट उजुरी प्राप्त भएपछि ब्युरोले प्राविधिक अनुसन्धान अगाडि बढाएको थियो । अनुसन्धानका क्रममा गिरोहको पहिचान भएपछि ब्युरोको टोलीले उनीहरूलाई काठमाडौँको ठमेलस्थित छायाँ सेन्टर कम्प्लेक्सबाट पक्राउ गरेको शुक्रबार जानकारी दिएको छ ।

उनीहरूको साथबाट प्रहरीले नेपाली तथा विदेशी नगद, विभिन्न बैंकका एटीएम कार्ड, भारतीय नम्बरका सिम कार्ड, मोबाइल फोन र क्यासिनो कार्डसमेत बरामद गरेको छ ।

पक्राउ परेका तीनै जनालाई विद्युतीय माध्यमसम्बन्धी कसुरमा थप अनुसन्धानका लागि काठमाडौँ जिल्ला अदालतबाट ५ दिनको म्याद थप गरी कारबाही अगाडि बढाइएको ब्युरोका प्रवक्ता तथा प्रहरी उपरीक्षक दिपक राज अवस्थीले जानकारी दिए ।

प्रहरीले सामाजिक सञ्जालमा आउने यस्ता अपरिचित र शंकास्पद लिंकमा क्लिक नगर्न सबैलाई आग्रह गरेको छ ।