खोज

बाँके, २० साउन ।

जमुनाहादेखि सुर्खेतको हर्रे डाँडासम्म फैलिएको सुर्खेत सडक वर्षासँगै हिलाम्मे बन्न पुगेको छ । कालोपत्रे भए पनि उक्त सडक भत्किएर खाल्डा र हिलाम्मे छ ।  एकातिर बजेट अभाव त अर्कोतर्फ मर्मतको लापरबाहीले गर्दा यो सडक मर्मत हुन सकेको छैन ।

सात दशक अगाडि बनेको यो सडक लुम्बिनी प्रदेशको राजधानी दाङ (देउखुरी) सँग सुर्खेत, कर्णाली प्रदेशलाई जोड्ने प्रमुख सडक पनि हो ।  ६९ किलोमिटर लामो यो सडकको महत्त्व झन् बढेको छ, तर अवस्था हेर्दा सरकार र ठेकेदारहरूको आँखा अझै पुग्न सकेको छैन ।

हल्दारपुर, पुरै कोहलपुर बजार, खजुरा चोकदेखि भेन्सीपुर, रामनगर, चिसापानी, बन कटुवा हुँदै हर्रे डाँडासम्मको सडक भत्किदा यात्रुहरूले समस्या झेलिरहेका छन् । ठेकेदार कम्पनीले मर्मतका लागि खनेको ठाउँमा वर्षाले झनै हिलाम्मे बनेको छ ।

‘डिभिजन सडक कार्यालय नेपालगन्जका प्रमुख इन्जिनियर नरेन्द्र भट्ट भन्छन्, “सुर्खेत रोडमा हामीले कमजोर ठाउँहरू मर्मत गर्दै छौँ, तर सबै ठाउँ एकै पटक गर्न सक्ने अवस्था छैन । बजेट सीमित छ । अहिले हल्दारपुर आसपास मर्मत भइरहेको छ ।”

‘सरकारले २०८१/८२ सालमा ६९ किलोमिटर सडक मर्मतका लागि जम्मा ३ करोड ७५ लाख बजेट छुट्टाएको थियो । जबकि आवश्यक रकम यसभन्दा दोब्बरभन्दा बढी हो । “हाम्रो विभागको मर्मतको योजना अनुसार यो बाटोलाई एक पटक पूर्ण कालोपत्रे गरेर त्यसपछि हरेक तीन वर्षमा मर्मत गर्नु पर्ने हो,” इन्जिनियर भट्टले थपे, “तर अहिले हामी टालटुलमै सीमित छौँ ।”

‘कोहलपुर नगरपालिका वडा नम्बर ६ का सुकदेव थारुले वर्षा लागेपछि त सडकमा सवारी चलाउनेले हैरानी भोगिरहेको बताए । कहिले स्कुटर पल्टिन्छ, कहिले बाइक खस्छ । २ महिना पहिला मात्रै कोहलपुरमा खनिएको बाटोमा चिप्लिएर मोटरसाइकल पल्टिँदा एक जनाको मृत्यु भयो, उनले थपे ।

‘प्रहरीका अनुसार, साउन महिना मात्रै नेपालगन्ज–कोहलपुर खण्डमा १३ वटा सवारी दुर्घटना भइसकेका छन् ।’ कोहलपुर नगरपालिकाका प्रमुख पूर्ण प्रसाद आचार्यले सडक सङ्घीय सरकारको अन्तर्गत रहेकाले नगरले काम नगरेको बताए ।

डिभिजन सडक कार्यालयले मर्मतका लागि महात्रिपुरा पञ्चकोशी नागदेव निर्माण कम्पनीसँग १ करोड २४ लाखको ठेक्का सम्झौता गरेको छ । हल्दारपुर क्षेत्रमा काम गरिरहे तापनि वर्षाको बहानामा, सडक खनिएको अवस्थामा छोडिदिएपछि झनै दुर्घटनाको जोखिम बढेको छ ।

नेपालगन्जको सुर्खेत रोड—जहाँ दैनिक हजारौँको यात्रा हुन्छ—आज राज्यको बेवास्ता, बजेटको अभाव, ठेकेदारको लापरबाही, र मौसमको क्रूरताले चर्किंदैछ । सवारी चालक, पैदल यात्री, व्यापारी, विद्यार्थी सबै पीडित छन्