खोज

बुटवल, २५ फागुन ।

पर्यटकीय गन्तव्य मणिमकुन्द सेन उद्यान संरक्षण समिति परिसरमा रहेको ५ सय वर्ष पुरानो सेनकालिन शिवालय मन्दिर उद्घाटन गरिएको छ । धार्मिक महत्व बोकेको मन्दिरको पुनःनिर्माण गरी शुक्रबार महाशिवरात्रीको दिन उद्घाटन गरिएको हो ।

कार्यक्रमको एक समारोहका बिच लुम्बिनी प्रदेशका सदस्य तथा पुर्वमन्त्री भोजप्रसाद श्रेष्ठ, बुटवल उपमहानगरपालिकाका नगरप्रमुख खेलराज पाण्डेयले संयुक्त रुपमा पुजापाठसहित मन्दिरको उद्घाटन गरेका छन् ।

कार्यक्रममा पुर्वमन्त्री श्रेष्ठले विकास अल्पकालिन नभई दीर्घकालिन हुने बताए । विकासको पूर्णता एक सय वर्षको अन्तरमा देखिने उनले भन्दै बुटवलको विकासमा गति लिईरहेको बताए । स्थानीय पालिकाबाट २५ वर्षअघि थालेको काममा अहिले स्वरुप लिईरहेको उनले दाबी गर्दै उनले अब यो विकासको गतिलाई तिव्रताका साथ अघि बढाउनुपर्ने बताए । फुलबारीलाई अध्ययन केन्द्रको रुपमा बिकासको योजना अघि बढाउनु उनले सुझाव दिए ।

कार्यक्रममा बुटवल उपमहानगरपालिकाका नगरप्रमुख खेलराज पाण्डेयले फुलबारी धार्मिक, पर्यटकीय स्थलको रुपमा विकास भएको भन्दै यहाँ ५ सय वर्ष पुरानो शिवमन्दिर, मदारबाबा थान लगायतका धेरै स्थलहरु रहेको बताए । भग्नावशेष दरबारलाई पुरातत्व विभागबाट स्वीकृति लिएर रंगमहल बनाउने योजना अघि बढाएको भएपनि पूरा हुन नसकेको उनले बताए ।

कार्यक्रममा उद्यानका अध्यक्ष माधव नेपालले शिवरात्रीको महत्वबारे प्रकाश पार्दै फुलबारी परिसरमा वि.स. १५७५ सालमा सेनराजाबाट स्थापना भएको मन्दिरलाई पुर्ननिर्माण गर्न सफल भएको बताए । बुटवलको मनोरम र पर्यटकिय गन्तव्यको रुपमा चिनाउन मन्दिरको समेत महत्व रहेको उनले बताए ।

कार्यक्रममा राष्ट्रिय उद्यान महासंघ नेपालका अध्यक्ष खेमप्रसाद लुईटेलले देशभरका उद्यानहरुलाई विशिष्टिकृत रुपमा विकास गर्ने गरी योजना बनाएर अघि बढाउन खोजेको बताए । नेपालकै उद्यानहरुको अध्ययनमा बुटवलको उद्यान सबैभन्दा ब्यवस्थित र उत्कृष्ट रहेको दाबी गरे ।

कार्यक्रममा उद्यानका सल्लाहकार विमल बहादुर शाक्य, नेवापुच नेवा विकास परिषदका अध्यक्ष काजीमान श्रेष्ठ, महासचिव युवराज घिमिरेले बुटवलको पहिचानको रुपमा फुलबारी रहेको बताए ।