खोज

बुटवल, १० चैत । गोर्खाली फिटनेसका उमेश राईले १७ औं धर्मश्री शारीरिक सुगठन प्रतियोगिताको उपाधि जितेका छन् । काठमाडौंको प्रज्ञा प्रतिष्ठानमा शनिबार अबेर भएको प्रतियोगितामा उनले ग्यालेक्सी फिटनेसका ललित धिमाललाई पछि पार्दै उपाधि आफनो नाम गरे । राईले उपाधिसंगै नगद १२ लाख रुपैया, ११ किलोको ट्रफी, मेडल, प्रमाणपत्र, चीन भ्रमणको अवसर र अन्य उपहार पाएका छन । उनी यसअघि १६ औं संस्करणको समेत विजेता हुन ।

उपविजेता धिमाल भने नगद ६ लाख रुपैया तथा तेस्रो स्थानका माधव सुवेदीले नगद ३ लाख रुपैयामा चित्त बुझाए ।

काठमाडौं महानगरपालिकाको मुख्य प्रायोजन तथा नेपाल ब्यायाम मन्दिरको आयोजना गरेको प्रतियोगितामा ६ तौल समूहका विजेताहरूले अन्तिम चरणमा उपाधिका लागि प्रतिस्पर्धा गरे । राई ८० किलोमाथिको तौल समूहमा पहिलो हुदै ओभरअलमा पुगेका थिए । चौथो स्थानका अशिम बाबु गुरुङ्गले २ लाख, पाँचौं स्थानका बिनोद सुनुवारले १ लाख ८० हजार र छैटौं स्थानका सिद्धान्त जसरोटियाले ५० हजार रुपैयाबाट पुरस्कृत भए ।

महिला बडी बिल्डिङमा तारा खाइजु पहिलो भइन् । मास्टर्सतर्फ किशोर शाहीले शीर्ष स्थान हासिल गरे । पुरुष स्पोट्र्स फिजिक १७० सेमीमुनिको समूहमा आकाश श्रेष्ठ र १७० सेमीमाथिको समूहमा रमन तुलाधर विजयी भए । विजेताहरूलाई काठमाडौं महानगरपालिकाका मेयर बालेन्द्र साहलगायतले पुरस्कार वितरण गरे ।