खोज

नवलपरासी पश्चिम्, ८ चैत ।

प्रदेश फुटबल संघद्वारा आयोजित दोस्रो लुम्बिनी प्रदेश लिग फुटबल प्रतियोगिताको उपाधि जनजागृती युवा क्लव बर्दियाले हात पार्न सफल भएको छ । फर्साटिकर युवा क्लब रुपन्देही र जनजागृती युवा क्लब बर्दियाबिच भएको फाईनल खेलमा फर्साटिकरलाई शुन्यका विरुद्ध एक गोल गर्दै बर्दियाले जित हात पारेको हो ।

खेलको पहिलो हाफको २४ औं मिनेटमा जनजागृती युवा क्लबका सुनिल आले मगरले गरेको गोल नै निर्णायक गोल बन्न पुगेको छ । अन्तिम समयमा तीन मिनेट थप गरिए पनि फर्साटिकरले कुनै पनि गोल गर्न नसकेपछि अन्ततः बर्दिया उपाधि उचाल्न सफल बनेको छ । खेलको “म्यान अफ द म्याच“गोलकर्ता बर्दियाका सुनिल आले भएका छन् ।

प्रथम हुने टिमले रु २ लाख २२ हजार २ सय २२ रुपैयाँ र द्वितीय हुने टिमले १ लाख ११ हजार १ सय ११ रुपैयाँ पुरस्कार राशी प्राप्त गरेका छन् । पुरस्कार बितरण समारोहमा बोल्दै अखिल नेपाल फुटबल संघका केन्द्रिय उपाध्यक्ष दीर्घबहादुर केसी(कुमार)ले फुटवलमा अहिले पनि संघियता आउन नसकेको उल्लेख गर्दै दुरदराजका ग्रामीण बस्तीमा समेत खेलकुदका कार्यक्रम मार्फत दक्ष खेलाडीको खोजी गर्नु पर्नेमा जोड दिए ।

चैत्र २ गतेबाट ८ गते सम्म बर्दघाट १६ स्थित सुर्यनगर रङ्गशालामा संचालन गरिएको फुटबल लिगका लागि बर्दघाट नगरपालिकाले ५ लाख रुपैया बिनियोजन गरेको फुटबल संघ लुम्बिनी प्रदेशका महासचिव भिमकाजी गुरुङले जानकारी दिए । खेलका ७ जिल्लाका ७ वटा टिम (जिल्ला लिग च्याम्पियन )हरुको सहभागिता रहेको थियो । पछिल्लो समय पुर्वाधारयुक्त सुर्यनगर रंगशाला सबै खेलप्रेमीहरुको रोजाईमा पर्ने गरेको छ ।