खोज

बुटवल, ३० कात्तिक –मंगलबार बिहान ११ बजे रोहिणी गाउँपालिका–३ मा न्युज बुटवल टुडेको टिम पुग्दा एमाले सचिव एवं क्षेत्र नं. १ का प्रतिनिधिसभा उम्मेदवार छविलाल विश्वकर्मा कार्यकर्तासँग भैरहवा–परासी मुख्य सडकमै भेटिए । देवदहबाट बिहानको घरदैलो सकेर रोहिणीमा घरदैलो गर्न आएकै बेला टुडेको टिम उनी भएको स्थानमा पुग्यो ।

त्यही एक स्थानीय प्रेमसागर शुक्ला बिरामी अवस्थामा रहेछन् । विश्वकर्मा गाडीबाट ओर्ले र सरासर उनको घरमा पुगेर स्वास्थ्य अवस्थाबारे बुझे । उनले पनि आफ्नो स्वास्थ्य समस्याबारे अवगत गराए । अनि विश्वकर्माले स्वास्थ्यलाभको कामना गरे । शुक्लाले पनि जितको शुभकामना दिए ।

त्यसपछि उनी नजीकैको अर्को घरमा पुगेर र राजेन्द्रप्रसाद शुक्लाको परिवारसँग भेट गरे । सुरुमा नमस्कार गर्दै छिरेका विश्वकर्मालाई शुक्लाले पनि नमस्कार फर्काए । विश्वकर्माले हालखवर सोधे । उनका कार्यकर्तालाई शुक्लाको हातमा चुनावी पर्चा थमाए र टोली आफ्नो बाटो लाग्यो ।

विश्वकर्मा फेरि गाडीमै चढेर र बाँकी रहेका १०–१२ घरमा गाडीबाट नओर्लिइकनै मत मागे । कतिपय स्थानीयले निर्वाचनका बेला पनि घरभित्रै आएर मत नमागेको भन्दै असन्तुष्टी पोखे । सँगै हिंडिरहेका एकजना कार्यकर्ताले सबै घरभित्र पस्नका लागि समयको अभाव भयो । त्यसकारण घरघरमा नपसी बाटैबाट भोट माग्ने काम गरिएको बताए ।

रोहिणी गाउँपालिका वडा नम्बर ३ रामनगरको घरदैलो सकेपछि उम्मेदवार विश्वकर्मा रोहिणी–३ कै अर्को टोल धकधई पुगे । त्यहाँ करिव १२–१५ जना किसानहरु आफ्नो खेतीपातीको काममा व्यस्त थिए । उम्मेदवार आउनासाथ सबै एकत्रित भए । उनीहरुले चुनावमा आएकाले केही आश्वासन दिइहाल्छन् कि भनेर आशा गरी बसेका थिए ।

विश्वकर्मा पैदल हिंडेर सबैलाई नमस्कार गर्दै अघि बढे । स्थानीय किसान रामअचल यादवले यहाँ सिंचाईको मुख्य समस्या रहेकाले समाधानका लागि आग्रह गरे । “भनेको बेला मल, बिउ पाइदैन, २ हजार रुपियाँ पर्ने एक बोरा रासायनिक मल भारतबाट साढे तीनहजार रुपियाँमा खरीद गरेर ल्याउनुपर्ने बाध्यता छ”–उनले गुनासो पोख्ने मौका पाए । उम्मेदवार विश्वकर्माले पनि रुचीपुर्वक गुनासो सुने र अर्को घरतर्फ लागे । हाम्रो टोलीले स्थानीय दुईजना युवालाई चुनावी माहौलबारे सोध्दा उनीहरु खासै खुल्न चाहेनन् । “घरमा बुढाबुढीले वृद्धभत्ता दिएको पार्टी भएकाले एमालेलाई मत दिनुपर्छ भन्छन्, तर यहाँ विकास गर्न कोही आउँदैनन्”–ती युवाले भने ।

त्यसपछि विश्वकर्मा राजुदेव गुप्ताको घरमा पुगे । ७५ वर्षीय गुप्ता आफ्नी ५५ वर्षीया श्रीमतीको साथमा कुर्सीमा बसिरहेका थिए । विश्वकर्मा पुग्नासाथ अंगालो हाले र आफूले पहिल्यैदेखि नै एमालेलाई भोट दिइरहेको बताए । “यसपाली पनि सूर्यमा भोट हाल्ने हो”–उनले खुलेर आफ्नो कुरा राखे । त्यसअगाडि कोही पनि मतदाताले यसरी खुलेर कुरा गरेका थिएनन् ।

विजय निश्चित रहेको दावी
बिहानको घरदैलो कार्यक्रम सकेपछि विश्वकर्मा रोहिणीका पार्टी अध्यक्ष सुनिल कौसलको घरमा खान खान पुगे । खाना खाइसकेपछि छोटो प्रतिक्रिया दिदै विश्वकर्माले आफ्नो विजय सुनिश्चित रहेको दावी गरे । “यहाँ एमालेसँग राप्रपा र जसपाको पनि तालमेल छ, यहाँका जनता एमालेले गरेको विकास देखेका छन्”–उनले भने ।

मंसिर ४ गते हुने प्रतिनिधि सभा चुनावमा आफूसहित प्रदेशसभाका उम्मेदवारहरु विजयी हुने निश्चित रहेको उनले दावी गरे । विश्वकर्मासँगै मंगलबारको घरदैलोमा क्षेत्र नम्बर १ (१) का प्रदेशसभा उम्मेदवार राप्रपाका नेता आशिष चौधरी पनि सँगै थिए । उनले पनि स्थानीयसँग भेटघाट गरी मत मागिरहेका थिए ।

रोहिणीमा घरदैलो सकेपछि विश्वकर्मा कार्यकर्ताहरुसहित ओमसतिया गाउँपालिकाको वडा नम्बर ६ मा पुगे । त्यहाँ करिव एक–डेढ सय स्थानीय जम्मा भएका थिए । विश्वकर्मा पुग्नासाथ स्थानीयले स्वागत गरे र करिव एक घण्टा कोणसभा भयो । त्यहाँ प्रतिनिधिसभाका उम्मेदवार छविलाल विश्वकर्मा र प्रदेशसभाका उम्मेदवार आशिष चौधरीले संबोधन गरे ।

संबोधनका क्रममा विश्वकर्माले क्षेत्र नम्बर १ मा सञ्चालनमा आएका केही विकास आयोजनाहरुको फेहरिस्त सुनाए र बाँकी कामहरु अव चुनाव जितेपछि पूरा गर्ने बाचा गरे । कार्यक्रम सकेपछि केही घरहरुमा पुनः घरदैलो गरे र त्यसक्रममा स्थानीयले सडक, सिंचाई, कृषिका लागि मल, बिउ, शिक्षा, स्वास्थ्य लगायतका कुरा गाउँमा नभएको बताए ।

उम्मेदवार विश्वकर्माले स्थानीयका माग एमाले सरकार बनेपछि क्रमशः पूरा गर्दै जाने बताए । ओमसतियाको कार्यक्रम सक्दा साँझ पर्नै आँटेको थियो । त्यसपछि विश्वकर्मा देवदहतर्फ लागे देवदह नगरपालिकामा इ रिक्सा व्यवसायीहरुसँग संक्षिप्त कार्यक्रम गरे । त्यहाँ केही व्यक्तिलाई पार्टी प्रवेश गराए र उनले संक्षिप्त संबोधन गरे । उक्त कार्यक्रमसँगै मंगलबारको कार्यक्रम समापन गरियो ।

प्रतिनिधि सभामा रुपन्देही–१ का उम्मेदवार विश्वकर्मालाई राप्रपा र जसपाको समर्थन छ । प्रदेश सभामा आशिष चौधरी र दधिराम न्यौपाने उम्मेदवार छन् । रोहिणीमा घरदैलो गर्नुअघि विश्वकर्मा नेता सुरेन्द्र श्रीको भलवारीस्थित घरमा पुगेर उनको बुबाको निधनप्रति श्रदान्जली अर्पण गर्दै शोकसभामा सहभागी भएका थिए ।त्यसअघि मंगलबार बिहानै देवदह नगरपालिका ६, केउलीमा नेकपा एमाले, राप्रपा र जसपाको संयुक्त भेलालाई पनि संबोधन गरेका थिए ।