खोज

काठमाडौँ ।

खानेपानीमन्त्री प्रदीप यादव र भारत सरकारका जलशक्तिमन्त्री सिआर पाटीलले आज, सोमबार, खानेपानी, सरसफाई तथा स्वच्छता (वास) क्षेत्रको विकास सम्बन्धी महत्वपूर्ण समझदारीपत्रमा हस्ताक्षर गरेका छन्।

भारतको राजधानी नयाँ दिल्लीमा आयोजित एक विशेष कार्यक्रममा यस समझदारीपत्रमा हस्ताक्षर गरिएको हो। नेपाल सरकारको तर्फबाट मन्त्री यादव र भारत सरकारको तर्फबाट जलशक्तिमन्त्री सिआर पाटीलले सम्झौतामा हस्ताक्षर गरेका छन्।

खानेपानी तथा ढल व्यवस्थापन विभागका महानिर्देशक ई रामकुमार श्रेष्ठका अनुसार, सम्झौतामा दुबै देशका सरकारबीच खानेपानी, सरसफाई र फोहोर व्यवस्थापनमा सहकार्य विस्तार गर्न र नेपालमा स्वच्छ पानीको पहुँच सुनिश्चित गर्न उद्देश्य रहेको छ।

सम्झौतामा भूमिगत पानी व्यवस्थापन, प्रविधि र सूचना आदानप्रदान, वर्षा पानी सङ्कलन र मापन, प्रविधि साझेदारी, तथा नेपाल सरकारलाई तालिम र प्रविधि सहयोग प्रदान गर्ने विषयमा ध्यान दिइएको छ।

भारत र नेपाल सरकारको सहकार्यले स्वच्छता क्षेत्रमा अन्तरसरकारी सहकार्यलाई सुदृढ बनाउने र जनताको जीवनस्तर सुधार गर्ने लक्ष्य राखिएको छ।

कार्यक्रममा नेपालका लागि भारतीय राजदूत नविन श्रीवास्तव, भारतको जलशक्ति मन्त्रालयका सचिवद्वय अशोक मिणा र देवश्री मुर्खजी, नेपाली राजदूतावासका उपनियोग प्रमुख डा. सुरेन्द्र थापा लगायतका प्रमुख अधिकारीहरूको उपस्थिती रहेको थियो।

यस समझदारीपत्रको उद्देश्य, नेपालमा सुरक्षित खानेपानीको पहुँच सुनिश्चित गर्दै, स्वच्छ वातावरणमा जनताको जीविकोपार्जनलाई सक्षम तुल्याउने र दुवै देशबीच मैत्रीपूर्ण सहकार्यलाई प्रवद्र्धन गर्नु हो।