खोज

बुटवल, १९ फागुन।
जिल्ला प्रहरी कार्यालय रूपन्देही जिल्लाका विभिन्न स्थानबाट भन्सार छली गरेर ल्याएका अवैध सामग्री नियन्त्रणमा लिएको छ। जिल्ला प्रहरी कार्यालय रूपन्देहीका प्रवक्ता प्रहरी नायब उपरीक्षक सुरज कार्कीका अनुसार भारतबाट नेपाल तर्फ अवैध रूपमा भन्सार छली चोरी निकासी/पैठारी गरेको अवस्थामा ९ लाख ३८ हजार ४ सय ४० रूपैयाँ बराबरका सामान नियन्त्रणमा लिएर कारवाही अघि बढाइएको हो।

वडा प्रहरी कार्यालय भैरहवाले सिद्धार्थनगर नगरपालिका वडा नं. ८ अञ्चलपुर स्थितबाट अवैध रूपमा भन्सार चोरी निकासी पैठारी गरी ल्याइएको साडी २६ पिस, चिनी १५० किलोग्राम, काजु २० पिस, अन्य किराना सामानहरू गरी जम्मा ५०,४४० रूपैयाँ बराबरको सामान बरामद गरी आवश्यक कारवाहीको लागि भैरहवा भन्सार कार्यालय बेलहियामा बुझाइएको छ।
यस्तै, प्रहरी चौकी खैरेनीले देवदह नगरपालिका वडा नं. ५ खैरेनी स्थितबाट बेवारिसे अवस्थामा रहेको बोरामा ८ बोरा, ४०३ पिस लेडिज साडी जम्मा ८,०६,००० रूपैयाँ बराबरको कपडाहरू नियन्त्रणमा लिई आवश्यक कारवाहीको लागि भैरहवा भन्सार कार्यालय बेलहियामा बुझाइएको हो।
यस्तै, प्रहरी चौकी कालिदहबाट लुम्बिनी सांस्कृतिक नगरपालिका वडा नं. १ आमापुल स्थितबाट अवैध रूपमा भन्सार चोरी निकासी पैठारी गरी ल्याइएको महिलाले प्रयोग गर्ने चुन्नी १८६ पिस, कुर्था सुलवाल २५ पिस, ८२,००० रूपैयाँ बराबरको सामान सहित नियन्त्रणमा लिई आवश्यक कारवाहीको लागि भैरहवा भन्सार कार्यालय बेलहियामा बुझाइएको जिल्ला प्रहरी कार्यालय रूपन्देहीले जनाएको छ।