खोज

बुटवल, १९ फागुन।
नेपाली काँग्रेसका नेता डा. शेखर कोइरालाले मुलुकलाई युवाहरूनै मिलेर बनाउनुपर्ने बताएका छन्। नेपालका युवाहरूले विश्वका सफल मुलुक बनाई सकेको उल्लेख गर्दै मुलुकमा सुशासनमात्र कायम भएमा युवाहरूले स्वदेशमै रोजगार सृजना गर्ने र मुलुकलाई बनाउने बताएका हुन्। अब युवालाई देशमै बस्ने वातावरण मिलाउन जरुरी रहेको धारणा राखे।
नेपाली काँग्रेस केन्द्रीय सूचना, संचार तथा प्रचार विभागले बुटवलमा आइतबार गरेको राष्ट्र निर्माणमा युवाको योगदान तथ्यमा आधारित प्रचार अभियान विषयक कार्यशाला गोष्ठीको आइतबार बुटवलमा उद्घाटन गर्दै उनले राजनीतिमा इमानको आवश्यकता रहेको बताए।

नेपालमा केही हुँदैन भन्ने सोचलाई बदल्न जरुरी रहेको उनले भने। उनले भने– ‘हामी नेपाली हो, हामी बनाउँछौँ नेपाल भन्ने सोच राख्न जरुरी छ।’ त्यसको निम्ति हामीले सुशासन दिन सक्नुपर्छ।’ युवाहरूलाई उद्यमशील बनाउनुपर्ने उल्लेख गर्दै युवालाई सम्भावनाको बाटो कोरिदिन राज्यको ध्यानाकर्षण गरे। उनले काँग्रेसका विभागहरूले नागरिकको चिन्ता बुझ्ने काम गर्नुपर्ने बताए। उनले काँग्रेसलाई असफल हुने छुट नभएको जिकिर गरेका थिए।

कार्यक्रममा पूर्वगृहमन्त्री तथा काँग्रेसका नेता बालकृष्ण खाँणले समयकै मितिमा महाधिवेशन हुने बताए। उनले काँग्रेसले संविधान र विधानको व्यवस्था उल्लंघन गर्न नसक्ने भएकाले विधानअनुसार पार्टीको महाधिवेशन भएरै छाड्ने बताए।
प्रजातान्त्रिक पद्दतीमा सत्ताको हस्तान्तरण गरिने पार्टी काँग्रेस मात्र भएकाले तोकिएकै मितिमा नेतृत्व परिवर्तनका लागि महाधिवेशन हुने स्पष्ट पारेका थिए। अहिलेको परिस्थितिमा मुलुकलाई निकास दिने नेतृत्व आवश्यक परेको बताए।