खोज

बर्दघाट, १८ फागुन । बर्दघाट खानेपानी तथा सरसफाई उपभोक्ता सँस्थाले उपभोक्ता सचेतना कार्यक्रम सम्पन्न गरेको छ । बर्दघाट नगरपालिका वडा नम्बर ४, नवलपरासीमा रहेको सँस्था अन्तर्गत खानेपानी सुरक्षा योजना टोलीको आयोजनामा कार्यक्रम सम्पन्न भएको हो ।

आयोजना क्षेत्रको शान्तिनगर र दिब्यनगर टोलका करिव १ सय २० उपभोक्ताको उपस्थिती रहेको कार्यक्रममा मुहान देखी मुखसम्म शुद्ध पिउने पानी कसरी उपलब्ध गराउने र उपभोक्ताले सँस्थाद्धारा वितरित खानेपानीलाई कसरी सुरक्षित उपभोग गर्ने भन्नेबारे उपभोक्तालाई सचेत गराइएको थियो ।

कार्यक्रमका प्रमुख अतिथी बर्दघाट नगरपालिका वडा नम्बर ४ का वडासदस्य जनक रावलले सँस्थाले २४ सै घण्टा शुद्ध पिउने पानी उपलब्ध गराइ यस क्षेत्रका जनताको आधारभूत आवश्यकता पूर्तिमा अहम भूमीका खेलेको बताए । सँस्थाका अध्यक्ष दिपक लम्सालले आयोजना क्षेत्रमा निरन्तर शुद्ध पिउने पानी उपलब्धतासँगै सँस्था सरसफाईको क्षेत्रमा पनि काम गरिरहेको बताए । टोल टोलमा खानेपानी र सरसफाईको महत्वको बारेमा सचेत कार्यक्रम गर्दा प्रभावकारी भएको उनले बताए ।

सँस्थाका उपाध्यक्ष एवं खानेपानी सुरक्षा योजना टोलीका सँयोजक कमल थापाले उपभोक्ताहरुलाई शुद्ध पिउने पानी उपलब्ध गराउने सँस्थाको दायित्व रहेको र उपलब्ध पानीलाई उपभोक्ताहरु पनि सुरक्षित तवरले उपभोग गर्नुपर्नेमा जोड दिए ।

सँस्थाका ब्यवस्थापक विष्णु कुमार भुसालले सहजीकरण गर्नुभएको कार्यक्रममा दिब्यनगर टोल विकास सँस्थाका अध्यक्ष भिम बहादुर राना, बँगलामुखी दुर्गा मन्दिरका अध्यक्ष श्रीधर भट्टराइ, मनिसरा मश्राङ्गी लगायतले पानी र सरसफाईको महत्वको बारेमा आ–आफ्नो धारणा राखेका थिए ।
खानेपानी सुरक्षा योजना टोलीले वार्षिक क्यालेण्डर निर्माण गरि आयोजना क्षेत्रभित्रका सबै टोलहरुमा सचेतना कार्यक्रम सम्पन्न गर्ने गरेको टोली सदस्य लक्ष्मी शर्माले बताईन ।