खोज

काठमाडौं ।

नेपाली कांग्रेसका केन्द्रीय सदस्य र शिक्षा विभाग प्रमुख नैनसिंह महरले नेपालका अन्तर्राष्ट्रिय सम्बन्धलाई प्रवर्धन गर्न विदेशी विद्यार्थीहरूलाई नेपालमा अध्ययन गर्ने वातावरण बनाउनु पर्ने बताएका छन्। उनले यो धारणा राष्ट्रिय, निजी तथा आवासीय विद्यालय एसोसिएसनको ८औं राष्ट्रिय महाधिवेशन उद्घाटन सत्रलाई सम्बोधन गर्दै राखेका हुन्।

नेता महरले सरकारलाई बजेटमा विदेशी विद्यार्थीहरूको लागि छात्रवृत्तिको अवसर प्रदान गर्न सुझाव दिए। उनका अनुसार, यस्तो छात्रवृत्ति नेपालका अन्तर्राष्ट्रिय सम्बन्धलाई बलियो बनाउँछ र नेपालको शिक्षा प्रणालीमा विश्वास निर्माण गर्न मद्दत पुर्याउँछ। उनले शिक्षा भूराजनीतिक दृष्टिकोणबाट महत्त्वपूर्ण रहेको पनि बताए।

नेपाललाई एक प्रमुख शिक्षा हब बनाउन महराले केही महत्त्वपूर्ण पक्षहरू प्रस्तुत गरे। उनले नेपालको भौगोलिक अवस्थिति र असंलग्न परराष्ट्र नीतिलाई प्रमुख फाइदा मान्दै भने, “नेपालले भारत र चीन जस्ता ठूला मुलुकहरूको नजिक रहेको अवस्थिति, व्यापारिक सम्भावना र शिक्षा क्षेत्रमा ठूलो योगदान गर्न सक्छ।”

नेपालले प्राकृतिक र जैविक विविधता, आयुर्वेद, पर्वतारोहण र मेडिकल शिक्षा जस्ता क्षेत्रमा अध्ययन र अनुसन्धानका अवसरहरू प्रदान गर्न सक्ने महराले विश्वास व्यक्त गरे।

सही रणनीति र योजनासँग नेपालले विश्वस्तरीय शिक्षा प्रदान गर्न सक्ने उनले उल्लेख गर्दै शिक्षा क्षेत्रमा सरकार र निजी क्षेत्रको सहकार्य आवश्यक रहेको बताए। उनले शिक्षा विधेयकको विषयमा सबैले अधिकार र कर्तव्य निर्वाहमा सहमति बनाउनुपर्ने आवश्यकता व्यक्त गरे।

त्यसैगरी, निजी क्षेत्रको लगानी सुरक्षा सम्बन्धी कांग्रेस पार्टीका विचारको बारेमा पनि महराले स्पष्ट पारे। उनले पार्टी सभापति शेरबहादुर देउवा संग शिक्षा क्षेत्रको लगानी सुरक्षा र निजी क्षेत्रको आश्वस्तता बारे छलफल भएको र यस विषयमा प्रधामन्त्रीसँग पनि छलफल गर्ने तयारी रहेको बताए। महामानवता र शिक्षा क्षेत्रको समृद्धिको लागि महराले सबैलाई काम गर्न आग्रह गरेका छन्।