खोज

चारनम्बर, १४ फागुन ।
सामाजिक सञ्जाल विधेयक मानव अधिकार मैत्री बनाउन मानव अधिकार तथा शान्ति समाज कपिलवस्तु शाखाले माग गरेको छ । सोमबार प्रमुख जिल्ला अधिकारी विश्वप्रकाश अर्यालमार्फत प्रधानमन्त्री तथा मन्त्रिपरिषद्को कार्यालयलाई ज्ञापन पत्र बुझाउँदै उक्त माग गरिएको हो । सामाजिक सञ्जाल विधेयकमा भएका संविधान प्रदत्त मौलिक हक, प्रेस र अभिव्यक्ति स्वतन्त्रता विरोधी प्रावधान खारेज गर्न र सरोकारवालाहरूसँग व्यापक परामर्श गरी विधेयकलाई मानव अधिकार एवं प्रयोगकर्ता मैत्री बनाउन आग्रह गरिएको मानव अधिकार तथा शान्ति समाज कपिलवस्तुका सभापति शिवकुमार कार्कीले जानकारी दिए ।
सरकारले माघ १३ गते सामाजिक सञ्जाल सञ्चालन, प्रयोग तथा नियमन गर्ने सम्बन्धमा व्यवस्था गर्न बनेको विधेयक राष्ट्रिय सभामा पेश गरेको थियो । उक्त विधेयकमा भएका केही प्रावधानले संविधान प्रदत्त मौलिक हक, प्रेस र अभिव्यक्ति स्वतन्त्रताको मर्म विपरीत दुरूपयोग हुन सक्ने भन्दै मानव अधिकार तथा शान्ति समाजको गम्भीर ध्यानाकर्षण भएको समाजले जनाएको छ । ‘अभिव्यक्ति स्वतन्त्रता, आधारभूत मानव अधिकार हो भने घृणात्मक अभिव्यक्ति अपराध हो, मानव अधिकार तथा शान्ति समाज सदैव अभिव्यक्ति स्वतन्त्रताको पक्षमा र घृणात्मक अभिव्यक्तिको विपक्षमा उभिएको छ,’ ज्ञापन पत्रमा उल्लेख छ ।