खोज

बुटवल, ९ फागुन ।
बुटवलमा जारी दोस्रो मेयर कप छात्र/छात्रा फुटबल प्रतियोगिता २०८१ को उपाधिका लागि छात्रतर्फ स्कलर्स होम बोर्डिङ स्कुल र न्यु होराईजन माबि तथा छात्रातर्फ गार्गी एकेडेमी र कालिका मानवज्ञान माविका बिचमा खेल हुने भएको छ । पाँचौं दिन भएको छात्र तर्फ पहिलो सेमिफाइनलमा स्कलर्स होमलाई सरस्वती माबिले २–० गोल तथा अक्सफोर्डले न्यु होराइजनलाई ४–१ गोल अन्तरले पराजित गर्दै फाइनलमा स्थान बनाएका थिए । विजेता दुबै स्कुलका एकएक खेलाडी बिरुद्ध उजुरी परेपछि आवश्यक कागजपत्र उपलब्ध गराउन नसक्दा प्रतियोगिताबाट टिम बाहिरिदा पराजित टिम नै फाईनलमा प्रवेश गरेको बुटवल नगर खेलकुद विकास समिति अध्यक्ष बोनिन पियाले बताए । उजुरीका आधारमा छानबिन गर्दा सम्बन्धित विद्यालयबाट प्रमाण पुग्ने कागजात उपलब्ध गराउन नसक्दा अक्सफोर्ड र सरस्वती मावि फाइनल खेल्नबाट बन्चित भएको नगर खेलकुद विकास समितिका सदस्य सेरजंग गुरुङले बताए ।

यता छात्रातर्फको पहिलो सेमिफाइनल खेलमा गार्गीले ज्ञानोदय माविलाई टाइब्रेकरमा पराजित गर्दै फाइनल यात्रा तय गरेको हो भने अर्को खेलमा नविनलाई २–० गोल अन्तरले पराजित गर्दै कालिका फाइनलमा प्रवेश गरेको छ । प्रतियोगिताको छात्रछात्रा दुबैको उपाधिका लागि फाईनल खेल शनिबार तामनगर स्थित चारपाला खेल मैदानमा हुने नगर खेलकुद विकास समिति प्रचारप्रसार संयोजक सुनिता गिरीले बताईन ।

प्रतियोगिताको छात्रतर्फ विजेता टिमले नगद एक लाख रुपैया, कप, मेडल तथा प्रमाणपत्र तथा उपविजेता टिमले नगद ६० हजार पुरस्कार, कप, मेडल तथा प्रमाणपत्र प्राप्त गनेृ समितिका सदस्य सरोज सिंहले बताए । यसैगरि छात्रा तर्फ विजेताले नगद ५० हजार नगद, कप, मेडल तथा प्रमाणपत्र, उपविजेताले नगद ३० हजार रुपैयासहित कप,मेडल तथा प्रमाणपत्र प्राप्त गर्नेछन । प्रतियोगितामा छात्रतर्फ २५ तथा छात्रातर्फ १० टिमले प्रतिस्प्रर्धा गरेका थिए ।