खोज

दाङ, २ फागुन ।

दाङ प्रहरीले एक महिलालाई बेचबिखन गरेको कसुरमा तीन जनालाई पक्राउ गरेको छ । जिल्ला प्रहरी कार्यालय दाङले माघ महिनाभर जिल्ला प्रहरी कार्यालय र मातहतमा रहेको प्रहरी इकाईबाट सम्पादन भएका काम बारे जानकारी दिएको हो । बिहीबार आयोजना गरेको पत्रकार सम्मेलनमा घोराही १५ बस्ने राजेश नेपाली र राधा पाण्डे तथा भारतको ईमिलिया मकुनहवाबाट रामनिवास मौर्यालाई नियन्त्रणमा लिएको छ । प्रहरीका अनुसार, राजेश र राधा श्रीमान श्रीमती हुन् भने मौर्या महिला किन्ने व्यक्ति हुन् ।

ती महिलालाई भारतमा लगेर उनीहरुले ३५ हजार भारतीय रुपैयाँमा मौर्यालाई बिक्रि गरेका थिए ।
माघ ४ गते राजेश र राधाले कृष्णनगर किनमेल गर्न भन्दै लगेको अवस्थामा कृष्णनगरको बाटो हुँदै भारतको ललिया ईमिलिया मकुनहवा भन्ने स्थानमा लगेर दाङकी २३ वर्षकी एक महिलालाई बेचेको अभियोगमा पक्राउ गरी सार्वजनिक गरेको हो ।
जिल्ला प्रहरी कार्यालय दाङका प्रहरी नायव उपरीक्षक चक्रबहादुर शाहका अनुसार इलाका प्रहरी कार्यालय गढवा प्रमुख प्रहरी निरिक्षक कालिका कार्कीको कमाण्डमा खटिएको प्रहरीको टोलीले भारत प्रहरीको सहयोगमा नियन्त्रणमा आावश्यक कारवाही अघि बढाईएको जानकारी दिएको छ ।

माघ ४ गते छोरी हराएको भन्दै प्रहरीमा परेको उजुरीका आधारमा खोजतलास अघि बढाएको थियो । जिल्ला प्रहरी कार्यालयबाट ७ गते परिपत्र भएपछि खटिएको प्रहरीको भारतीय सुरक्षा निकायको सहयोगमा पक्राउ गर्न सफल भएको इलाका प्रहरी कार्यालय गढवाकी प्रहरी निरिक्षक कार्कीले बताइन । भारतबाट बेचिएकी भनिएकी महिलाले नेपालमा आफन्तलाई सम्पर्क गरी आफु बेचिएको खबर गरेपछि भारतीय सुरक्षा निकायसँगको सहयोगमा अभियुक्तलाई पक्राउ गर्न सहज भएको बताए ।

भारतको बलरामपुर प्रहरीसँग समन्वय गरेर ललिया ईमिलिया मकुनहवा भन्ने स्थानमा रहेको ४९ वर्षका रामनिवास मौर्यालाई माघ १६ गते नियन्त्रणमा लिएको उनले बताए । विवाह गरेर राख्ने भन्दै बिक्रि गरेको अवस्थामा महिलाको उद्धार गरेर नेपाल ल्याईएको र ललाईफकाई बिक्रि गर्ने राजेश र राधालाई यही माघ१७ गते घोराही १५ बाट नियन्त्रणमा लिई आवश्यक कानूनी कारवाही अघि बढाईएको प्रहरी उपरीक्षक शाहले जानकारी दिए। पक्राउ परेको तीन जनालाई मानव बेचबिखन कसुरमा मुद्धा चलाईने अहिले थप अनुसन्धान अघि बढाईएको उनले बताए ।