खोज

कपिलवस्तु, (बुटवल टुडे), ३० माघ– जिल्ला प्रशासन कार्यालय कपिलवस्तुले बजार अनुगमनलाई तीव्रता दिइएको छ । बुधबार तौलिहवामा गरिएको ६ मिठाई पसलको अनुगमनका क्रममा कैफियत भेटिएका तीन मिठाई पसललाई ६० हजार जरिवाना तिराईएको छ ।
कपिलवस्तुका सहायक प्रमुख जिल्ला अधिकारी पर्मानन्द घिमिरे, प्रमुख प्रशासकिय अधिकृत प्रेमराज रोकाहा, खाद्य प्रविधि तथा गुण नियन्त्रण डिभिजन कार्यालय कपिलवस्तुका प्रमुख सरोज खनाल, कपिलवस्तु नगरपालिकाका सामाजिक बिकास अधिकृत पदमराज श्रेष्ठ, घरेलु तथा साना उद्योग कार्यालय कपिलवसतुका उद्योग बिकास सहजकर्ता बिनय सैनी सहितको टोलीले बजार क्षेत्रका मिठाई पसलको आकस्मिक बजार अनुगमन गरेको थियो । सो क्रममा पहिलो पटकमा दिएको निर्देशन उल्लंघन गरेका तिन मिठाई पसल मध्य दुई पसललाई २५/२५ हजार र एक मिठाई पसललाई १० हजार रूपैयाँ जरिवाना गरिएको खाद्य प्रविधि तथा गुण नियन्त्रण डिभिजन कार्यालय कपिलवस्तुका प्रमुख सरोज खनालले जानकारी दिए ।

अनुगमनका क्रममा गुणस्तरहिन भेटिएको तेल, पकौडा, समोसा लगायतको सामग्री समेत नष्ट गरिएको थियो । व्यापारीले अखाद्य वस्तु मिसाईएको मिठाईहरू बिक्री गर्दै आएको जनगुनासोका आधारमा आकस्मिक बजार अनुगमन गरेको जनाएको छ । मंगलबार पनि टोलीले शुद्धोधन गाउँपालिकामा रहेको पनोरमा बेकरी उद्योग र रिलाईन्स पानीको अनुगमन गर्दा बिगतको निर्देशन पालना नगरेको भेटिएका कारण दुवै उद्योगलाई १ लाख जरिवाना लगाएको थियो ।

बजारमा अखाद्य वस्तु नियन्त्रणको उद्देश्यले नियमित बजार अनुगमन गर्न शुरु गरिएको सहायक प्रमुख जिल्ला अधिकारी पर्मानन्द घिमिरेले जानकारी दिए । पहिलो पटक भविष्यमा गल्ति नगर्न सम्झाई बुझाई निर्देशन दिँदा पनि निर्देशन पालना नगरेको भेटिएपछि कारवाही स्वरूप जरिवाना गराईएको उनले प्रष्ट पारे । यसअघि बहादुरगंज, चन्द्रौटा, गोरुसिंगेमा बजार अनुगमन गरिएको बताउदै अब चाड पर्व लक्षित मात्रै नभई आकस्मिक र निरन्तर बजार अनुगमन गरिने उनले जानकारी दिए ।