खोज

पाल्पा, २६ माघ ।

रिब्दीकोट गाउँपालिकाका किसान बढी दुध दिने क्षमता भएका गाई अनुदानमा पाएकोमा दंग परेका छन् । दुग्ध उत्पादनको माध्यमबाट कृषकको जिवन स्तरमा परिवर्तन ल्याउने उद्देश्यले १५ वटा गाई वितरण गरिएको हो । गाउँपालिकाको साझेदारीमा रिब्दिकोट कृषि परियोेजना अन्तर्गत ग्रामीण आर्थिक विकास सघंले एकवटा उन्नत जातको जर्सी र १४ वटा सबै भन्दा बढी दुध दिने होलस्टिन जातको दुहुनो गाई वितरण गरिएको संघका प्राविधिक मिना खडकाले बताइन् ।

परियोजना र कृषकको साझेदारीमा दैनिक ३० लिटर दुध दिने क्षमताको दुहुनो गाई पाएकी ख्याहाकी कमला पोखरेलले दुधको बजार राम्रो भएकाले उन्नत जातको गाईको पालन गरेको बताउँछिन् । स्थानीयस्तरमै दुध संकलन केन्द्र मार्फत सदरमुकाम तानसेनको डेरीमा दैनिक २५ लिटर दुध पठाउन पाउदा खुसी लागेको उनी बताउँछिन् । लागत मूल्य बढी भएपनि होलस्टिन जातको गाईले बढी दुध दिने हुँदा कृषकको मेहनतसंगै लगानी सजिलो संग उठ्ने भएका कारण यो जातको गाइ ल्याएको पालुङ मैनादी डवकाकी महिला कृषक सिताकुवर बताउँछिन् । यहाँका कृषकहरुले पहिले पहिले गाउँमा ससाना स्थानीय जातका गाई पाल्ने प्रचलन थियो । जब दुध उत्पादन गर्ने, उत्पादित दुधको सहकारी मार्फत संकलन गरी बजारीकरण हुन लागेपछि जर्सी गाई पालन गर्ने लहर नै चल्यो । जर्सीको तुलनामा दुध दोब्बर मात्रामा दिने उन्नत जातको गाई आउन लाग्यो त्यस पछि उन्नत जातको गाईप्रति आकर्षण बढन लागेको स्थानीय कृषकहरु बताउँछन् ।

कृषकहरुलाई आर्थिक रुपमा सवल र सक्षम बनाउन उन्नत जातको पशुपालनतर्फ प्रेरित गरेको स्थानीय सरकारका प्रमुख नारायण बहादुर कार्की बताउँछन् । स्थानीय सरकारको साझेदारीमा संचालित यस कार्यक्रमबाट भैरवस्थानको मसुरेमा एक, खस्यौलीको सिरुखरकमा २, पालुङ मैनादीको डबकामा ४, देउराली र ख्याहामा ४, ४ वटा गाई वितरण गरिएको थियो ।

ग्रामीण आर्थिक विकास संघका प्रमुख तथा निर्देशक लिलाबहादुर कार्कीका अनुसार यसरी वितरित गाई ८० हजार देखि १ लाख ३० हजार सम्मका रहेका र कृषकको माग अनुसार वितरण गरिएको हो । यस अगाडि सघंले पशुपालन गर्ने कृषकहरुका लागि घास र गोठको व्यवस्थापनका लागि आर्थिक संगै प्राविधिक सहयोग गरिएको सघंका निर्देशक कार्की बताउछन् ।