खोज

भैरहवा, १३ कात्तिक ।
मंसिर ४ को प्रतिनिधि सभा तथा प्रदेश सभा चुनावलाई लक्षित गरी रुपन्देही ३ मा सत्ता गठबन्धनले ६६ बुंदे घोषणापत्र सार्वजनिक गरेको छ । संकल्पपत्र नाम दिएर सार्वजनिक घोषणापत्रमा अधिकांश बुदा स्थानीय तहले अघि सारेका र पाकिलाका मेयर उम्मेदवारले गर्ने घोषणापत्रसंग मिल्दाजुल्दा एजेण्डा छन् । संसदमा कानुन निर्माण गर्न जाने पद भएपनि गृहमन्त्री बालकृष्ण खांण सहितका उम्मेदवारहरुले के कस्ता कानुन बनाउने भन्नेमा घोषणापत्रमा कतै केही उल्लेख गरेका छैनन् । घोषणापत्रमा अधिकांश बुंदा यसअघि नै अघि बढिसकेका भौतिक पूर्वाधारका साथै कृषि, शिक्षा, स्वास्थ, खेल, वातावरणका विषय समेटिएका छन् ।

घोषणापत्रमा सिद्धार्थनगर नगरपालिका वरपर ‘सिद्धार्थ चक्रपथ’ निर्माण, तिनाउ–दानव नदीमा ‘जनताको तटबन्धन’ कार्यक्रम थप प्रभावकारी बनाउने र डण्डा ÷ रोहिणी नदीमा पनि नदी कटानलाई व्यवस्थित गरिने उल्लेख छ । मोतीपुर औद्योगिक क्षेत्रको क्षेत्रफल घटाएर सानो औद्योगिक क्षेत्र बनाउने उल्लेख छ ।

संकल्पपत्रमा बेलवास– बेथरी सडकको स्तरोन्नति,बेलहिया बुटवल खण्डमा रहेको ६ लेन सडकलाई अझ आकर्षक बनाई पर्यटकीय आकर्षणको केन्द्र बनाउने उल्लेख छ । यस्तै ‘मर्चवारदेखि मुस्ताङ्गसम्म’ सडक निर्माण, वेथरी, मैनहिया, हर्नैया, दयानगर– छपिया, वनघुसरी थाना हुँदै मानपकडी सूर्यपूराको सडकलाई दुवैतिर नाली बनाई कालोपत्रे बनाइने, पत्थरडाँडादेखि टिकुलीगढ हुँदै पश्चिम अमुवा बजार तथा वनघुसरीसम्मको सडकलाई स्तरोन्नति गरी दुवैतिर नालीसहितको कालोपत्रे गरिने लेखिएको छ । संकल्पपत्रमा बुटवल भैरहवा सुनौली राजमार्गमा मेट्रो ट्रेन सञ्चालनका लागि सम्भाव्यता अध्ययन गरिने जनाइएको छ ।

बेलहियामा निर्माणाधीन ‘एकीकृत भन्सार प्रणाली’ तत्काल निर्माण प्रारम्भ, सिद्धार्थनगर नगरपालिका भित्र रहेको विशेष आर्थिक क्षेत्रमा विद्युतीय सबस्टेसन निर्माण तथा व्यवस्थित सञ्चालनका लागि नितिगत निर्णयहरु गर्ने जनाइएको छ । गौतम बुद्ध अन्तर्राष्ट्रिय विमानस्थलमा अन्तर्राष्ट्रिय उडानलाई बढाइने र नेपालका विभिन्न सहरहरूमा पनि आन्तरिक उडान तथा कार्गो सेवा सुचारु थप गरिने संकल्पपत्रले समेटेको छ । भैरहवामा रहेको सिद्धार्थ क्रीकेट रंगशालालाई अन्तर्राष्ट्रिय खेल सन्चालन गर्न सकिने किसिमले स्तरोन्नति गर्ने, भिम अस्पतालको स्तरवृद्धी गर्ने, यज्ञोदय दुधनाथ थारु बहुमुखी क्याम्पस, शुद्धोधन, जनता उच्च मावि, सियारी तथा रूपन्देही क्याम्पस, सिद्धार्थनगरको स्तरोन्नती र प्राविधिक विषयमा थप कार्यक्रम संचालन गर्न विशेष पहल गरिने उल्लेख छ ।

घोषणापत्र सार्वजनिक कार्यक्रमलाइ सम्बोधन गर्दै प्रतिनिधि सभा सदस्य उम्मेदवार गृहमन्त्री बालकृष्ण खाँणले भौतिक पुर्वाधारका साथै मानविय र सामाजिक बिकासलाई पनि चुनावी संकल्पपत्रले समेटेको बताए ।

उनले आफु टुरिस्ट उम्मेदवार नभएको प्रष्टिकरण दिंदै रुपन्देही नै आफ्नो राजनितिको केन्द्र भएको बताए । कार्यक्रममा प्रदेश सभा सदस्य उम्मेदवार रामचन्द्र ढकाल र लोसपाका सन्तोष पाण्डेले पनि आफ्ना धारणा राखेका थिए ।