खोज

गुल्मी, ३१ साउन ।
गुल्मीमा धान रोपाइँ सकिएको छ । जिल्लामा यसपटक ९३ प्रतिशत क्षेत्रफलमा धान रोपाईँ भएको छ । समयमै पानी परेपछि किसानहरूले बेलैमा धान रोपाइँको काम सम्पन्न गरेका हुन । टारी खेतहरूमा पनि यस पटक पानी प्रशस्त भएका कारण धान रोप्नका लागि आकाशे पानीको भरपर्नु परेन ।
गुल्मीमा जेठको दोश्रो सातादेखि साउनको अन्तिम सातासम्म धान रोपाइँ हुने गर्दछ । धान रोपाइँपछि यहाँका खेतका फाँटहरू हरियो र रसिलो देखिन थालेका छन् । अधिकाँस कृषकहरू खेतमा रोपेको मकै भित्राएपछि मात्र धान रोप्ने गर्दछन ।

जिल्लामा सात हजार चार सय २८ हेक्टर क्षेत्रफलमा यस पटक धान रोपाइँ गरिएको हो । कृषि ज्ञान केन्द्र गुल्मीका अनुसार कुल आठ हजार छ सय हेक्टर क्षेत्रफलमध्य सात हजार नौ सय ८८ हेक्टरमा धान रोपाइँहुने अनुमान गरिएको थियो । तर यस पटक अनुमान गरे भन्दा पाँच सय ६० हेक्टर धान रोपाइँको क्षेत्रफल घटेको कृषि ज्ञानकेन्द्र गुल्मीका प्रमुख नवराज भण्डारीले बताए ।
गत वर्षको तुलनामा यस पटक धान रोपाइँको प्रतिशत बढे पनि धान उत्पादनको क्षेत्रफल भने घटेको बताईएको छ । धान रोपाइँको क्षेत्रफल घट्नुमा जनशक्तिको अभाव, बढ्दो बसाईसराई, जोत्नकालागि गोरुको अभाव, महँगो ज्याला र गाउँमा ज्याला मजदुरी गर्नेहरूको कमी लगायत रहेको कृषि ज्ञान केन्द्र प्रमुख भण्डारीले बताएका छन् ।

जिल्लाको कुल धान उत्पादन हुने क्षेत्रफल मध्य गत वर्ष ९० प्रतिशत क्षेत्रफलमा मात्र धान रोपाइँ भएको थियो । कृषि ज्ञान केन्द्र गुल्मीका अनुसार गत वर्षको तुलनामा जिल्लामा यस वर्ष समयमा वर्षा शुरु भएसँगै किसानहरू दुइ महिना धान रोपाइँमा व्यस्त बने । समयमै पानी परेपछि यस पटक सिँचाईको खासै समस्या नपरेको किसानहरूले बताएका छन ।

जिल्लामा धान उत्पादन हुने मुख्य स्थानहरूमा बडिगाड, चौरासी, छल्दी, निस्ती, पनाहा, सुदि, खैरेनी, खज्र्याङ, शान्तिपुर, मजुवा, खैरेनी लगायतका फाँटहरू रहेका छन । यी फाँटहरू सबै भन्दा बढी धान उत्पादनहुने क्षेत्रमा पर्दछन । गुल्मीमा बर्खे र चैते गरि दुई पटक धान रोपाइँ गरिदै आएको छ । धान यस जिल्लामा मकैपछि दोश्रो प्रमुख खाद्यान्न बाली मानिन्छ । गुल्मीमा गत वर्ष २३ हजार मेट्रिकटन धान उत्पादन भएको कृषि ज्ञान केन्द्रले जनाएको छ ।