खोज

देवदह ।

रुपन्देहीको देवदह नगरपालिका वडा नं. २ ढेकावर स्थित केरवानी स्वास्थ्य चौकीको आयोजनामा किशोरकिशोरी मैत्री स्वास्थ्य सेवा सम्बन्धी सरोकारवाहरुलाई अभिमुखिकरण तथा सामुदायिक अन्तरकृया कार्यक्रम सम्पन्न भएको छ ।

स्वास्थ्य संस्थाको कार्यक्षत्र भित्र रहेका सम्पूर्ण किशोरकिशोरी, अभिभावक, शिक्षक ÷शिक्षिका, जनप्रतिनिधि लगायत सरोकारवालाहरुलाई किशोरकिशोरीले पाउने सेवाको बारेमा जानकारी दिने उद्देश्यले उक्त कार्यक्रमको आयोजना गरिएको हो ।

केरवानी स्वास्थ्य चौकीमा उपलब्ध रहेको किशोरकिशोरी मैत्री सेवाको समुदायस्तरसम्म जानकारी दिने उद्देश्यले कार्यक्रमको आयोजना गरिएको स्वास्थ्य चौकी प्रमुख काशीराम रेग्मीले जानकारी दिए ।

देवदह नगरपालिकाको पहिलो किशोरकिशोरी मैत्री स्वास्थ्य सेवायुक्त स्वास्थ्य संस्थाको रुपमा प्रमाणिकरण तथा घोषणा भइसकेको अवस्थामा किशोरकिशोरीको शारीरिक, मानसिक, यौनिक समस्याका बारेमा अभिभावकहरुलाई जानकारी दिनका लागि कार्यक्रमको आयोजना गरिएको बताए ।

कार्यक्रमको सहजिकरण गर्दै जनस्वास्थ्य निरिक्षक काशीराम रेग्मीले किशोरकिशोरी अवस्थामा समस्याको पहिचान गर्न नसक्दा र किशोरकिशोरीहरुले आफ्नो समस्या बताउन नसक्दा विभिन्न घटना घट्ने बताउंदै त्यसतर्फ सबै चनाखो हुनु आवश्यक रहेको औंल्याए ।

किशोरकिशोरीले आफ्ना समस्याहरु सम्बन्धित ठाउंमा राख्न र त्यसको समाधान खोज्नेगरी आवश्यक सम्पुर्ण मापदण्डहरु पुरा गरी केरवानी स्वास्थ्य चौकीलाई किशोरकिशोरी मैत्री स्वास्थ्य संस्था घोषणा गरिएको बताए । उनले किशोरकिशोरीहरुको समस्या पहिचान गरे समाधान खोज्न सकिने बताउंदै किशोरकिशोरीहरुमा विभिन्न शारीरिक, मानसिक, यौनिक तथा भावनात्मक परिवर्तन हुने र सो परिवर्तनहरु नै उनीहरुको चासो, चिन्ता र आवश्यकताको विषय रहेकोले यौन तथा प्रजनन स्वास्थ्य सम्बन्धी सचेत गराउनु आवश्यक रहेको पनि उनले औल्याए ।

सोही अवसरमा प्रमुख रेग्मीले किशोरकिशोरीहरुको अधिकारहरु, नेपालको मुलुकी अपराध संहिता ऐनमा उल्लेख भएको विवाहको उमेर तथा बालविवाह सम्बन्धी कानुन, राजस्वला, सुत्केरी तथा गर्भपतन सम्बन्धी कानुन लगायतका विषयमा समेत जानकारी प्रदान गरेका थिए ।

केरवानी स्वास्थ्य चौकी सञ्चालन तथा व्यवस्थापन समितिका अध्यक्ष तथा देवदह २ का वडाध्यक्ष दल बहादुर राकसकोटीको अध्यक्षतामा भएको कार्यक्रममा जनप्रतिनिधि, सामुदायिक तथा संस्थागत विद्यालयका शिक्षकशिक्षिका, विद्यार्थी, टोलसुधार समितिका पदाधिकारी, अभिभावक, स्वास्थ्यकर्मी, महिला सामुमायिक स्वास्थ्य स्वयंसेविका लगायतको सहभागिता रहेको थियो । कार्यक्रममा सिनियर अहेव समिरा पौडेलले पनि मन्तव्य व्यक्त गरेका थिए ।