खोज

बुटवल, २८ साउन ।
हाटबजारमा रहेको रूपन्देही जिल्ला खेलकुद विकास समितिको जग्गामा व्यावसायिक भवन निर्माण भैरहेको छ । खेलप्रेमी, खेलाडीहरूको निरन्तर बिरोध भैरहँदा समेत भवन निर्माण भने रोकिएको छैन । समितिको मुख्य भवन छोडेर चारैतिर खाल्टो खन्ने, पिल्लर हाल्ने काम केही कामदारहरूले गरिरहेका छन् । १८ कोठे व्यावसायिक भवन कुन ठेकेदार र कस्ले बनाउँदै छ भन्ने बारे भने अनविज्ञता छ । सार्वजनिक काम गर्दा त्यसको जानकारी दिने प्रचलन र कानुन नै छ ।

खेल खेल्न आउने खेलाडी, स्वयंसेवी प्रशिक्षकहरू स्थान अभावको कारण खेल्न पाइरहेका छैनन् । ‘अब हामी कहाँ खेल्ने हो कुनै टुंगो छैन ।’— एक जना कराँतेका प्रशिक्षक मदन थापाले दुःखेसो गरे । करीब १६ कठ्ठा जग्गा रहेको समितिमा एउटा ईन्डोर हल, कार्यालय प्रमुखको कोठा एउटा, पदाधिकारी र सदस्य बस्ने हल छ । राखेपको प्रोजेक्टमा निर्माण भएको ट्रस लगाईएको खेल्ने ठाउँ बाहेक अब त्यहाँ ठाउँ अभाव छ । करीब दुई दर्जन खेल दर्ता रहेको रूपन्देहीमा अधिकांश खेलका प्रशिक्षक नै छैनन । कराँते, तेक्वान्दो, टेबलटेनिस, क्रिकेट खेलबाहेक अन्य खेलका प्रशिक्षक नै छैनन् । राष्ट्रिय खेल भलिबलका धेरै राष्ट्रिय खेलाडी उत्पादन गरेको जिल्लामा स्वयंसेवक प्रशिक्षकहरूले धानेको छ । यस्तोमा यी खेल विकास र पूर्वाधारमा जोड दिनुको साटो समिति अहिले व्यावसायिक भवन निर्माणको तयारीमा जुट्नु गलत भएको खेलाडीहरू बताउँछन ।

लुम्बिनी प्रदेश सरकार परिवर्तन हुँदा खेलकुद विकास परिषद लुम्बिनीमा नयाँ सदस्यसचिव तिरण गौतम मनोनित भए । सदस्य सचिव परिवर्तनसँगै १२ जिल्लाको खेलकुद विकास समितिमा नयाँ मनोनित नभएको बेला कर्मचारीहरू सलबलाएको खेलप्रेमीहरू बताउँछन । ‘नेतृत्व बिहीन हँदा कर्मचारीहरू लाभ लिन अग्रसर भएका छन ।’—एक जना खेलप्रेमीले भने ।
बुटवल उपमहानगरपालिकाका पूर्व जनप्रतिनिधि तथा खेलप्रेमी यम बराल खेलकुदको जग्गालाई दुरूपयोग भएको बताउँछन । पटकपटक यसबारे बुझ्न खोज्दा समेत कार्यालयका सचिव राजेन्द्र श्रेष्ठले सूचना नदिएको उनले गुनासो गरे ।
यता अखिल नेपाल फुटबल संघ (एन्फा) का उपाध्यक्ष तथा नेपाल ओलम्पिक कमिटिका सदस्य दीर्घ बहादुर केसी (कुमार) खेललाई नै जग्गा अभाव भएको बेला व्यावसायिक भवनको अवधारणा ल्याउनु गलत भएको बताउँछन । ‘यो खेलकुदको सम्पत्ति हो यसलाई इन्डोर स्पोटर्स खेल्ने प्रयोजनमा प्रयोग गर्नुपर्छ,’—उनले भने ।

मुख्य चोकको जग्गामा व्यावसायिक भवन बनाएर आर्थिक श्रोत जुटाउने लक्ष्य बोकेको कार्यालय प्रमुख राजेन्द्र श्रेष्ठ बताउँछन् । राखेपबाट स्वीकृतमा काम अघि बढेको भनिएपनि खेलाडी र खेलप्रेमीहरूको माग र आवश्यकता बिपरित भएको कामको तिब्र बिरोध भएको छ ।
कार्यालयको सचिव आफै ठेकेदार !

रूपन्देही जिल्ला खेलकुद विकास समितिका अध्यक्ष भुपेन्द्र थापा क्षेत्री (हरि) ले उपाध्यक्ष जय प्रसाद लाम्गादेलाई कार्यबाहक दिएको बेला राजनीतिक पहुँचका आधारमा ल्याइएको व्यवसायिक भवन शिलन्यास देखि नै बिबाद छ । व्यावसायिक भवनको काम अघि बढाउनु पछाडीको रहस्या आर्थिक लाभ नै देखिन्छ ।

१८ वटा व्यावसायिक भवन निर्माण अघि बढ्दा केही व्यवसायीहरूले भने अग्रिम भाडा तिरेको पाईएको छ । भवन कहिले हुने पत्तो नभएको बेला भाडा भने न्यूनतम ३ लाख रूपैयाँको दरले उठाउन शुरु भएको पाईएको छ । हिसाब हेर्दा १८ कोठाको व्यापारीसंग एडभान्स वापत लाखौ रूपैया उठाईएको छ । कालीलेक कन्सट्रक्सन प्रालि मध्यपुर ठिमी १ भक्तपुर ठेकेदार कम्पनीले केही सटरवालासंग गरेको सम्झौतापत्र र बंैक भौचर अनुसार खातावालाको नाम ईन्द्र बहादुर पुन र राजेन्द्र श्रेष्ठको संयुक्त नाममा खाता देखिएको छ । यता राजेन्द्र श्रेष्ठ कार्यालय सचिव समेत रहेको हुँदा उनको नाम ठेकेदार कम्पनीमा आउनुले आर्थिक हिनामिनाको संकेत गरेको छ । यस विषयमा बुझन खोज्दा सचिव श्रेष्ठ सम्पर्कमा आउन चाहेनन् ।