खोज

लमहि, २३ असार । दाङमा शुक्रबारराती देखि परेको भिषण बर्षापछि आएको बाढी बस्तीमा पसेको छ । लगातारको बर्षाका कारण दाङको देउखुरीका बस्ती डुबानमा परको हो । ढल निकास अबरुद्ध हुँदा लुम्बिनी प्रदेशका मन्त्रालयहरू जलमग्न भएका छन् । राप्ती गाउँपालिका–५ लठ्ठहवा, पहरूवा र कालापानी, लमहीका धनपुरुवा, बनघु्ररी, गढवाका बोधिपुर सेमरहवा लगायतमा दर्जनौ गाउँमा बाढी पस्न सुरु गरेको छ । बाढीका कारण उच्च जोखिममा परेका घरका नागरिकलाई सुरक्षित स्थानमा सारिएको छ । सुरक्षा निकायहरूले उच्च जोखिममा परेका बस्तीका नागरिकलाई सुरक्षित स्थानमा सार्न थालेका हुन् ।

लगातार पानी परिरहेकाले स्थानीय खहरे खोलामा जलसतह बढेको छ । यस्तै, इलाका प्रहरी कार्यालय, सिसहनियाँको भवन पनि डुबानमा परेको छ । कार्यालयको सामग्रीहरू सुरक्षित स्थानमा सारिएका छन् । यस्तै, राप्ती नदीमा जलसतह बढ्दै गएको छ । नदी तटीय क्षेत्रमा डुबान र कटानको जोखिम उच्च रहेकाले सतर्क रहन अपिल गरिएको छ । राप्ती नदिले बगाउँदा एक जना बेपत्ता भएका छन । देउखुरीमा राप्ती नदीको बाढीले एक जनालाई बगाएको छ । लमही नगरपालिका–७, हस्नापुर स्थित राप्ती नदिको बाढीमा फसेका मध्ये दुई जनाको सकुशल उद्दार गरिएको छ भने एक जनालाई बाढीले बगाउँदा वेपत्ता भएका छन् ।

राजपुर गाउँपालिका–२ का किसान दुध विक्री गर्न लमही आएको र फर्किने क्रममा राप्ती नदीको बाढीमा फसेका थिए । तीन जना संगै रहेपनि एक जनालाई बाढीले बगाएको र दुई जना सिमलको रुखमा चढेर सुरक्षित बसेका थिए । नेपाल सशस्त्र प्रहरी बल ४१ नम्बर रिजर्भ गण अर्जुनखोलाबाट खटिएकन सुरक्षाकर्मीले दुई जनालाई सकुशल उद्दार गरेको प्रहरी सहायक निरिक्षक प्रकाश ढकालले जानकारी दिए । राजपुर–२ निवासी ४८ बर्षीय तुलाराम यादव र ४० बर्षीय दयाराम यादवको उद्धार गरिएको छ । उनीहरूसंगै साथमा रहेका १८ बर्षीय राजकुमार यादव भने बाढीमा बगेर बेपत्ता भएको प्रहरीले जनाएको छ । लगातार बर्षा कारण खहरेखोला अन्तर्गतका केही सडकहरू समेत अबरुद्ध बनेका छन ।

गढवा कालाकाटे सडक खण्डको गढवा ५ बाँकीमा बाटो अबरुद्ध भएको छ । प्रनाहा पुल देखि आगाडि बाढीले बाटो बगाएको छ । दाङ जिल्लामा वर्षाको मापन खतराको स्तरभन्दा माथि पुगेको छ । १ सय मिमि भन्दा बढीलाई खतरा मानिन्छ । असार २२ गते विहान सम्मको वर्षाको मापन पछिल्लो २४ घण्टामा घोराही २१४ मि मि, लमही १८१.८ मि मि, लालमटिया १४९.४ मिमि, मिगंगादी ११६.४ मि मि, कोइलाबास ६५.२ मि मि, अम्बापुर १९.० मि मि, मिरातामाटा १०.६मि मि, बगासोती ५१.६ मि मि पानी परेको जिल्ला प्रशासन कार्यालय दाङले जनाएको । बर्षा भैरहेकोले सबै ठाउमा यो अनुपात बढेको छ । सनिवार पनि दिनभर पानी परेकोले खतरा बढदै गएको छ । सबै पालिका बिपत शाखा, नेपाल रेडक्रस, ३ वटै सुरक्षा निकायहरू प्रभावित क्षेत्रमा हाइअलटको अबस्थामा रहेको जिल्ला बिपत ब्यबस्थापन समितिका सयोजक तथा जिल्ला प्रशासन कार्यालय दाङका जिल्ला प्रमुख रामबन्दु सुबेदीले बताए ।