खोज

बर्दघाट, १४ जेठ ।

बर्दघाट नगरपालिकाले पुर्वपश्चिम राजमार्ग र बर्दघाट त्रिवेणी सडक छेउमा रहेका अतिक्रमित अस्थाई टहरामा डोजर चलाइ हटाएको छ ।
बर्षौदेखी सार्बजनिक र बनको जग्गा अतिक्रमण गरी निर्माण गरिएका संरचना नगर प्रहरी,नेपाल प्रहरी र जनप्रतिनिधिको संयुक्त टोलिले उक्त संरचनामा डोजर चलाइ हटाइएको हो । अस्थायी सँरचनामा डोजर चलाइए पनि स्थायी सँरचना भने यथावत नै रहेका छन ।

पुर्व पश्चिम राजमार्गस्थित बर्दघाट ४ को बजार क्षेत्रमा डिभिजन बन कार्यालयको जगामा बनाईएका ९ वटा ब्यवसायिक टहरा हटाईएको छ ।यसै गरी बर्दघाटको त्रिबेणि चोक दक्षिण तर्फ बसपार्क क्षेत्रका होटल तथा खाजाघर संचालन रहेका अस्थायी घर टहरा हटाईएको नगरपालिकाले जनाएको छ । बसपार्क अगाडी रहेका १५ वटा अस्थायी टहरा भत्काईने नगरले जनाएको छ ।

यस अघि बर्दघाट नगरपालिकाले सार्बजनिक जग्गामा निर्माण गरिएका संरचना हटाउन ७ दिन समयवधीको सुचना जारी गरेको थियो । अग्रिम सुचना जारी गर्दा समेत संरचना नहटाएको भन्दै नगरपालिकाले अन्ततः डोजर चलाएको हो ।
नगरको सौन्दर्यता नै विगार्ने र सडक छेउमै सँरचना निर्माण गरी ब्यापार ब्यवशाय गर्दा दुर्घटनाको जोखिम समेत रहेको बताउँदै सँरचना हटाएर ब्यवस्थित पार्किङ ब्यवस्थापन गरिने नगर प्रमुख शम्भुलाल श्रेष्ठले बताए ।

सार्वजनिक जग्गामा निर्माण गरिएका अबैध संरचना हटाउने कार्यलाई अभियानकै रुपमा अघि बढाईने नगरपालिकाले जनाएको छ ।यता केही साना ब्यवसायिहरुले भने बिकल्प नदिईकनै भत्काउदा जिकिकोपार्जनमा कठिनाई हुने बताउदै उपयुक्त बिकल्प दिन समेत नगरपालिका सँग माग गरेका छन ।

बर्दघाट त्रिवेणी सडकको १५ मिटर क्षेत्रभित्रका सँरचना हटाउन आएको टोलीको नेतृत्व गरेका वडा नम्बर ४ का वडाध्यक्ष बेधविना तिवारीले बसपार्क र टि सि यन क्षेत्रको सडकको जग्गा अतिक्रमति गरी बनाइएका अस्थायी सँरचनाले दुर्घटनाको जोखिम समेत बढाएको बताए ।

बर्दघाट त्रिवेणी सडक खण्ड अन्तर्गत सडकको पूर्व पट्टि बसपार्क देखी बर्दघाट मण्डप प्रवेशद्धार सम्म बनेको खाडलका कारण र सुकेका रुखका कारण जोखिम बढेको बताउँदै १५ दिन भित्र माटो पटान गरी खाडल पुरी वर्षातको पानीको उचित निकासको ब्यवस्थापन गर्ने र वन कार्यालयसँग समन्वय गरी सुकेका रुख हटाइने समेत तिवारीले बताए ।

एकातिर सौन्दर्यता गुमेको र दुर्घटना जोखिम बढेको भन्दै अस्थायी टहरा हटाउने अर्कोतिर सडक छेउमै बनेको खाडलमा पानी जम्ने समस्या भइ पानीको निकास नहुँदा पानी जम्ने समस्याले थप जोखिम थपिने भएकोले पनि समस्याको समाधान गर्दै जाने हो, वडाध्यक्ष तिवारीको भनाइ छ ।

बर्दघाट नगरले अतिक्रमित जग्गा र अस्थायी सँरचना हटाउने अभियान निरन्तर जारी राखिने समेत बताएको छ ।