खोज

कपिलवस्तु, ११ जेठ। बुद्ध जयन्तीको अवसर पारेर कपिलवस्तुको तिलौराकोट दरबारबाट पहिलो पटक मायादेवी ट्रेल रन आयोजना गरिएको छ । कपिलवस्तुको तिलौराकोट दरबारको पुर्विगेटबाट शुरु भएको मायादेवी ट्रेल रन निग्लिहवा, अरौराकोट, दोहनीकोट हुँदै मायादेवी मन्दिर लुम्बिनीसम्म पुगेको थियो । युएस एड, नेपाल पर्यटन बोर्ड र लुम्बिनी बिकास कोषको आयोजनामा तिलौराकोटबाट ३९ किलोमिटर दुरीको मायादेवी ट्रेल रन नाम दिएर म्याराथन आयोजना गरिएको हो ।

महारानी मायादेवीले तिलौराकोट दरबार देखी माईती देवदह जाँदा लुम्बिनी स्थित पवित्र बगैचांमा सिद्धार्थ गौतमलाई जन्म दिएको स्थान सम्म ट्रेल रनको आयोजना गरिएको जनाईएको छ । लुम्बिनी प्रदेशका मुख्यमन्त्री जोख बहादुर महराले ट्रेल रन ब्यानर छोपेर कार्यक्रमको उद्घाटन गरे । त्यसैगरि मायादेवी मन्दिर परिसर पुगेर ट्रेल रनका बिजेताहरूलाई युएस राजदुतावासका डेप्युटी चिफ अफ मिसन जोशन पि मिक्स र मुख्यमन्त्री महराले पुरस्कार हस्तान्तरण गरे । ट्रेल रनमा पुरुषतर्फ प्रथम भएका किरण सिंह बोगटी, दोस्रो भएका शुसिल कुमार शाही र तेस्रो भएका बिनोद रोकायालाई जनही १ लाख, ५० हजार र २५ हजार पुरस्कार दिईएको थियो । त्यसै गरि महिला तर्फ पुर्ण लक्ष्मी न्यौपाने, अनिता राई र असिम बिक पहिलो दोस्रो र तेस्रो भएका थिए ।

उनीहरूलाई जनही १ लाख, ५० हजार र २५ हजार नगद पुरस्कार दिइएको थियो । ३९ किलोमिटर, १० किलोमिटर र ५ किलोमिटर गरि तिन समूहमा दौडको आयोजना गरिएको थियो । १० किलोमिटर तर्फको समूहमा हरिशरण सिम्खडा, भरत परियार र मान बहादुर बस्नते पहिलो दोस्रो र तेस्रो भए । त्यसैगरि ५ किलोमिटर दौड तर्फ महिलामा सरिता घर्ति मगर, खुसी प्रजापती र रितिका शर्मा तर्फ पुरुष तर्फ उमेश बरई, रमेश केवट र अजय पाण्डेय पहिलो दोस्रो र तेस्रो भएका थिए । बिजेता खेलाडीलाई प्रमाणपत्र, मेडल र नगद पुरस्कार दिईएको थियो ।

ट्रेल रन कार्यक्रमको व्यवस्थापन भन काठमाण्डौ र युथ युनिभेसन प्रा.लिले गरेका थिए भने कपिलवस्तुको मायादेवी गाउँपालिका र शुद्धोधन गाउँपालिकाले सहकार्य गरेका थिए । बिजेतालाई पुरस्कार र कार्यक्रम आयोजनामा ईसेवा सहितका वित्तिय संस्थाको सहयोग रहेको थियो । कार्यक्रमको मिडीया पार्टनरको रूपमा गच्छामी मिडिया ग्रुप रहेको थियो । मायादेवी सुत्केरी मार्गमा ट्रेल रनको आयोजना गरि यसको प्रचार प्रसारलाई सहयोग पुर्याउन खोजिएको व्यवस्थापनमा सहयोग गरेको युथ युनिभेसन प्रा.लिका कार्यकारी अध्यक्ष बिभुषण बिष्ठले जानकारी दिए । मायादेवी ट्रेल रनले लुम्बिनी र कपिलवस्तुको पर्यटन प्रवद्र्धनमा सहयोग पुर्याउने लुम्बिनी प्रदेशका मुख्यमन्त्री जोख बहादुर महराले बताए ।