खोज

काठमाडौं,९ जेठ । अमेरिकी दूतावासले नेपाली क्रिकेटर सन्दीप लामिछानेलाई भिसा दिन अस्वीकार गरेको छ ।
सन्दीपले अमेरिका र वेस्ट इन्डिजमा हुन लागेको टी २० विश्वकपमा सहभागी हुन जान अमेरिकाको भिसा एप्लाई गरेका थिए । जसलाई अमेरिकी दूतावासले अस्वीकृत गरेको सन्दीपले सामाजिक सञ्जालमार्फत उल्लेख गरेका छन् ।

सन् २०१९ मा पनि अमेरिकी दूतावासले क्यारेबियन प्रिमियर लिग सीपीएल खेल्न जान लागेका सन्दीपलाई सुरुमा भिसा दिएको थिएन । आलोचना भएपछि दूतावासले सन्दीपलाई बोलाएर अन्तर्वार्तालगायतको प्रक्रिया पूरा गरेर भिसा दिएको थियो ।
लामिछानेलाई अमेरिकी दूतावासले भिसा नदिएपछि नेपाल क्रिकेट संघ क्यान स्तब्ध बनेको छ ।

सन्दीपले आफ्नो मुद्दामा अदालतबाट पूर्ण सफाइ पाइसकेका छन् । उनको भिसा रोक्नुपर्ने कुनै कारण थिएन । दूतावासमा प्रभाव भएका केही अभियन्ता, नेता र मिडियाले सन्दीपलाई भिसा रोक्न दबाब दिएका थिए ।

क्यान स्रोतले अमेरिकी दूतावासको शैलीप्रति खेद व्यक्त गरेको छ । मुद्दाबाट सफाइ पाइसकेको प्रख्यात खेलाडीलाई भिसा नदिनु आपत्तिजनक रहेको क्यान स्रोतले भनेको छ ।

भिसा रद्दलगत्तै क्यान सचिव पारस खड्का सन्दीपसँग छलफलमा छन् । विश्वकपमा जाने खेलाडीलगायत सबैको भिसा प्रक्रियामा पारसले दूतावाससँग समन्वय गरिरहेका थिए ।