खोज

बुटवल, ३१ बैशाख । बुटवलमा सोमबारदेखी उजिरसिह वडा कप २०८१ शुरु भएको छ । बुटवल उपमहानगरपालिकाको आर्थिक सहयोगमा बुटवल क्रिकेट विकास समितिको आयोजनामा भएको उद्घाटन खेलमा वडा नं २ विजयी भएको छ । वडा न २ ले वडा नं १९ लाई ४ बिकेटले पराजित गरेको हो ।

नहरपुर माबि स्थित खेल मैदानमा वडा नं २ ले टस जितेर ब्याटिङको निम्तो दिएपछि मैदानमा उत्रेको वडा नं १९ ले १६ ओभरमा ८ बिकेटको नोक्सानीमा ९६ रनको लक्ष्य खडा गरेको थियो । उसका लागि हरि गैरेले १८ बलमा १६, सुभाष सापकोटाले १३ बलमा १५ तथा दीपक डुम्रेले १० बलमा १४ रनको योगदान दिए । कम स्कोरमा रोक्न वडा नं २ का सृजन श्रेष्ठले ३ तथा मदन घिमिरे र छबिलाल पौडेलले २—२ बिकेट लिए । मध्यम लक्ष्यलाई वडा नं २ ले १२.५ ओभरमा ६ बिकेटको नोक्सानीमा भेटायो । वडा नं २ का सुनिल गुरुङले २१ बलमा ३५ तथा बिनोद रणपालले १४ बलमा २४ रन जोडे । वडा नं १९ का दीपक डुम्रे र रोशन रानाले समान २—२ बिकेट लिए । वडा नं २ का सृजन श्रेष्ठ प्लेयर अफ दी म्याचबाट पुरस्कृत भए ।

यसैगरि सोमबार नै भएको दोस्रो खेलमा वडा नं ७ ले वडा नं १६ लाई ६ बिकेटले पराजित गरेको छ । टस जितेर वडा नं ७ ले ब्याटिङको निम्तो दिएपछि वडा नं १६ ले १६ ओभरमा ९ बिकेटको नोक्सानीमा ११८ रनको लक्ष्य खडा गरेको थियो । उसका लागि विजय जमरकट्टेलले २८ बलमा ४४ तथा सिमन्त केसीले ११ बलमा २२ रनको योगदान दिए । वडा नं ७ का बिवेश खत्रीले ४ तथा अस्वीन भट्टराई र सुनिल सोमई मगरले समान २—२ बिकेट लिए । मध्यम लक्ष्य पछ्याएको वडा नं ७ भने १४.१ ओभरमा ४ बिकेटको नोक्सानीमा भेटायो । वडा नं ७ का एजाज अहमदले २९ बलमा ३४, रोहित पासवानले २८ बलमा २४ तथा रमेश राईले १० बलमा २४ रन जोडे । वडा नं १६ का बासु सापकोटाले २ बिकेट लिए । खेलमा बिबेश खत्री प्लेयर अफ दी म्याच भए ।

प्रतियोगिताको उपाधि विजेतालाई नगद ३० हजार, कप, मेडल र प्रमाणपत्र, उपविजेता टिमलाई नगद १५ हजार, कप, मेडल, प्रमाणपत्रबाट पुरस्कृत गरिने तथा म्यान अफ दी सिरिजलाई नगद २५००, ट्रफि, प्रमाणपत्र, उत्कृष्ट बलर र ब्याट्सम्यानलाई नगद १५०० रुपैया, ट्रफि, प्रमाणपत्रबाट पुरस्कृत गरिने आयोजक क्लबका अध्यक्ष रोमित बज्राचार्यले बताए । प्रतियोगितामा १६ टिमले भाग लिएका छन । गतवर्ष वडा नं ३ को टिम विजेता रहेको थियो ।