खोज

सुर्खेत, २९ बैशाख ।

सुर्खेतको वीरेन्द्रनगरमा भएको प्रथम ज्ञान कर्णाली हाफम्याराथनको उपाधि नेपाली सेनाका नरेन्द्र रावलले प्राप्त गरेका छन् । आज वीरेन्द्रनगरमा भएको प्रतियोगितामा नेपाली सेनाका रावत प्रथम भएका हुन् । यस्तै, नेपाली सेनाका रामजी बस्नेत दोस्रो र श्रीकेश राई तेस्रो भएका छन् । सशस्त्र प्रहरी बल (एपीएफ) का राजन चौधरी चौथो भए ।

यसैगरी हाफ म्याराथन अन्तर्गत महिलातर्फको उपाधि विभागीय टीम सशस्त्र प्रहरी बल (एपीएफ) का पुष्पा भण्डारीले प्राप्त गर्न सफल भएकी छन् । २१ किलोमिटर दौडमा एपीएफकी भण्डारीले उपाधि जितेकी हुन् । सल्यानकी भण्डारीले एपीएफबाट अन्तर्राष्ट्रिय स्तरका दौडमा उपाधि चुम्दै आएकी छन् । यस्तै, नेपाली सेनाकी सिर्जना पाण्डे दोस्रो हुँदा जुम्लाकी राज्यलक्ष्मी रावत तेस्रो भएकी छन् ।

म्याराथनको विजेता महिला तथा पुरुषलाई ५५ हजार रुपैयाँ पुरस्कार प्रदान गरिएको छ । यस्तै, दोस्रोलाई ३० हजार र तेस्रो स्थान हासिल गर्नेलाई २० हजार रुपैयाँ नगद प्रदान गरिएको छ । प्र्रतियोगिताको उद्घाटन प्रदेशका मुख्यमन्त्री यमलाल कँडेलले गरेका हुन । म्याराथनमा एक हजारभन्दा बढी सहभागी भएको आयोजक रेस नेपालका अध्यक्ष टीएस ठकुरीले जानकारी दिए । कर्णालीमा आयोजना हुने १० औँ राष्ट्रिय खेलकुदलाई प्रवद्र्धन गर्न कर्णाली हाफ म्याराथन आयोजना गरिएको रेस नेपालले जनाएको छ ।