खोज

बुटवल, २४ बैशाख । युवा पलायनको वर्तमान अवस्थालाई रोक्न पर्यटन उद्योग उपयुक्त बिकल्प भएको एक कार्यक्रममा बोल्न बक्ताहरुले दाबी गरेका छन । पर्यटनमा अघि बढेका युवाहरुलाई प्रोत्साहन हुने गरि सरकारबाट नीतिगत रुपमा योजना ल्याउन समेत उनीहरुले सुझाव दिएका छन । बुटवल कालिकानगरमा करीब १ करोड रुपैया लगानीमा होटल द प्राणगढ शुभारम्भ कार्यक्रमको एक समारोहका बिच रुपन्देही होटल तथा रेष्टुरेन्ट ब्यवसायी संघका अध्यक्ष लेखनाथ भण्डारीले उद्घाटन गर्दै युवा पलायनलाई रोक्ने विकल्प पर्यटन उद्योग भएको दाबी गरे । युवाहरुलाई स्वरोजगार पेशामा जोड्ने सरकारबाट नीतिगत रुपमा योजना ल्याउनुपर्ने सुझाव दिए । ब्यवसाय थला पर्नुमा घरभाडाको मार, बैकको ब्याजदरसंगै प्रदेश राजधानीसमेत सर्नु प्रमुख कारण भएको उनले दाबी गरे। शान्तिसुरक्षा मुख्य चुनौती देखिएको उनले बताए । पर्यटन प्रवर्द्धनका लागि संघ संस्थागत रुपमा पहल गर्दै आएको दाबी उनले गरे । बुटवल बजारलाई चलायमान बनाउन रात्रीकालिन ब्यवसाय आवश्यकता भएको उनले बताए ।

कार्यक्रममा बुटवल उपमहानगरपालिका वडा नं ११ का वडाअध्यक्ष रामचन्द्र क्षेत्रीले प्राकृतिक रुपमा नेपाल धनी देशभएको भन्दै यसलाई पर्यटन र उद्योगमा जोड्न जरुरी रहेको बताए । राजनितिक नेतृत्वप्रति आम नागरिकको वितृष्णा बढ्दै गएको भन्दै अब आफैबाट ससाना विकासमा लाग्नुपर्ने सुझाव दिए । होटल, रेष्टुरेन्ट ब्यवसायीहरु अब आफ्नो क्षेत्रका पर्यटकिय गन्तव्यबारे चिनाउने गरि अभियान थाल्नुपर्ने उनले बताए ।
कार्यक्रममा संघका वरिष्ठ उपाध्यक्ष माधव कुमार खनालले युवा पलायनको वर्तमान विकराल अवस्थामा अनुभवी दुई जना पर्यटनबाट स्वदेशमा काम गर्ने गरि लगानी गरिनु सकारात्मक भएको बताए । कालिकानगर होटल ब्यवसाय विकासमा अगाडि रहेको उनले बताए ।
कार्यक्रममा संघका महासचिव अर्जुन भुषालले देशको आर्थिक अवस्था सुधारतर्फ गैरहेको भन्दै पर्यटनबाट आर्थिक समृद्धिको नारासहित आफुहरु निरन्तर अगुवाई गरेको बताए । कालिकापथ, अमरपथ र ट्राफिक चोक क्षेत्रलाई रात्रीकालिन ब्यवसाय संचालन गर्ने पहलका लागि अघि बढाएको उनले बताए ।

बुटवलमा होटलमा दुई दशक अनुभव बटुलेका कृष्ण भुषाल र ब्यवस्थापनमा अनुभवी ऋषिराम पोखरेलले बुटवलमा नया होटल संचालनमा ल्याएका छन । ईन्डौर कटेज, देउराली होटल , होटल बेकन चलाएका भुषाल र बैकमा अनुभवि पोखरेलले करीब १ करोड रुपैया लगानीमा कालिकानगरमा सुविधासम्पन्न होटल द प्राणगढ संचालनमा ल्याएका छन ।

होटलका संचालक कृष्ण भुषालले आवासिय र खानाका परिकारसहितको सेवा दिईने बताए । करीब १ कठ्ठा १ धुर जग्गामा निर्माण गरिएको चार तल्ला भवनमा लिजमा संचालनमा रहेको होटलमा सुविधासम्पन्न १६ वटा कोठाहरु छन । सय जना क्षमताको बार र रेष्टुरेन्ट तथा ७० जना क्षमताको सेमिनार हल अण्डरग्राउण्ड रहेको छ । ब्यवस्थित पार्किङ समेत रहेको छ ।