खोज

लमही, २० बैशाख । लुम्बिनी प्रदेशका मुख्यमन्त्री जोखबहादुर महराले मिडियालाई रचनात्मक सुझाव सहितको आलोचना गर्न आग्रह गरेका छन् । नेपाल पत्रकार महसंघ लुम्बिनी प्रदेशको चौथो साधारणसभा तथा चौथो अधिबेसनलाई दाङको लमहीमा उद्घाटन गर्दै मुख्यमन्त्री महराले मिडियाले सरकारको प्रसंशा भन्दा समालोचनात्मक सुझाव दिनुपर्ने बताए । उनले भने,‘तपाइहरू मिडियाले परिवर्तनलाई संस्थागत गर्ने काममा र हरेक राजनीतिक परिवर्तनमा ठूलो योगदान गर्नुभएको छ, तपाइहरूसँग ठूलो शक्ति छ यो शक्तिलाई अब भयो पुग्यो भनेर बस्न भने हुँदैन ।’

सरकार संचालनको क्रममा आफूहरूमा कमजोरी हुनसक्ने भन्दै मुख्यमन्त्री महराले तत्काल कमजोरी औंल्याउँदा आफूले सकारात्मक रूपमा लिने भन्दै प्रतिशोध भावनाले कोहीपनि अघि बढ्न नसक्ने बताए । सरकार यसपालि नयाँ ढङ्गबाट अघि बढ्न खोजेको जानकारी दिँदै मुख्यमन्त्री महराले सरकार गठन, संसदीय समितिको नेतृत्व चयन देखि प्रदेशसभालाई विजनेश दिने काममा सफल भएको बताए ।
निरासाको खेती गरेर जनतालाई अलमल्याउने काम पनि कहीँकतैबाट भइरहेको सङ्केत गर्दै मुख्यमन्त्री महराले सत्यको पक्षमा कलम चालउन आग्रह गरे । उनले भने,‘हामी निरासा बाँड्ने काम नगरांै,गरेपछि सबै सम्भव छ, परिवर्तन र आर्थिक समृद्धि हाम्रै पालामा हुन्छ भनेर लागौँ भएन खत्तम भयो भन्ने कोणबाट होइन ।’ यस्तै कार्यक्रमका बिशिष्ट अतिथि लुम्बिनी प्रदेश सरकारले आन्तरिक मामिला तथा संचार मन्त्री दिनेश पन्थीले पत्रकारहरूले आफ्नो पेसालाई मर्यादित बनाउँदै सामाजिक दायित्वलाई पनि पूरा गर्नुपर्ने बताए ।

त्यसैगरि लुम्बिनी प्रदेश सरकारका आन्तरिक मामिला तथा संचार मन्त्री दिनेस पन्थीले मिडियामाथि आएका चुनौति सामना गर्दै सार्वजनिक हित प्रवद्र्धनका लागि अझ सशक्त रूपमा पत्रकार महासंघ लुम्बिनी प्रदेशले विशेष भूमिका खेल्नुपर्ने धारणा राखे । लुम्बिनी प्रदेशका १२ जिल्लाका पत्रकार भेला भएको कार्यक्रममा पत्रकारहरुले पत्रकारको छाता संगठन नेपाल पत्रकार महासंघले महासंघका शुद्धिकरणको नाममा अनावश्यक राजनीतिकरण गरेको आरोप लगाएका छन् । पत्रकारको क्षमता अभिबृद्धि, संस्थागत विकास, पेसागत सुरक्षाको सट्टा सक्रिय पत्रकारलाई हटाएर महासंघलाई बदनाम गर्न नहुने तर्क पत्रकारहरूको थियो ।

कार्यक्रममा नेपाल पत्रकार महासंघ रूपन्देही शाखाका अध्यक्ष रामराज पोख्रेलले शुद्धिकरणको नाममा जिल्ला शाखालाई बलिको बोका बनाएको गुनासो गरेका थिए ।  आफूहरूलाई शुद्धिकरण गर्न निर्देशन दिने र प्रदेश र केन्द्रिय समितिबाट शुद्धिकरणमा परेर हटाइएका पत्रकारलाई थप्न बरु सक्रियलाई हटाउने काम भइरहेको बताए । पत्रकार महासंघ लुम्बिनी प्रदेशका सल्लाहकार भरत केसीले पनि पत्रकार महासंघल पत्रकारको पेशागत सुरक्षा र मिडियाको संरक्षणमा काम गर्न नसकेको बताए ।

लुम्बिनी प्रदेश संचार प्रतिष्ठानका अध्यक्ष मिलन गाहा मगरले सबै पत्रकारलाई समेटेर प्रतिष्ठान अघि बढ्ने भन्दै मिडिया र पत्रकारको हकहितका लागि प्रतिष्ठानले काम गर्ने बताए । कार्यक्रममा नेपाल पत्रकार महासंघका केन्द्रीय वरिष्ठ उपाध्यक्ष चलाइएको शुद्धिकरण अभियान आफै सकारात्मक रहेको दाबी गरे । क्रियाशील पत्रकारलाई महासंघले सधै सम्मानका साथ संस्थामा राख्ने जानकारी दिँदै पत्रकारले सत्यको पक्षमा सधै कलम चलाउन कुनै धक नमान्न समेत आग्रह गरे । ‘अदालतको विपक्षमा लेख्न हुँदैन भन्ने भान सबैलाई भएको भन्दै अदालतको गलत ब्याख्या, फैसला, नजिर छ भने पनि डटेर विरोध गर्न पत्रकारलाई निर्देशन दिए । महासंघका लुम्बिनी प्रदेशका अध्यक्ष बसन्त गिरी का अनुसार बन्द सर्तले पत्रकारका संचारमाध्यमको हकहितमा आधारित १० बँुदे भालुबाङ घोषणापत्र जारी गरेको छ ।