खोज

बुटवल, १० बैशाख । मदन भण्डारी स्पोर्ट्स एकेडेमीको आयोजनामा जेठको पहिलो साता बुटवलमा हाफ म्याराथन तथा रोड रेस राष्ट्रिय खुल्ला प्रतियोगिता हुने भएको छ । युवा खेलाडीहरुलाई लक्षित गरि प्रतियोगिता गर्न लागेको सोमबार बुटवलमा पत्रकार सम्मेलन एकेडेमीका केन्द्रिय अध्यक्ष ध्रुव आचार्यले बताए । ‘विद्यालयस्तरका खेलाडीहरुलाई प्रोत्साहन गर्ने र खेलाडी उत्पादनमा सहयोग गर्ने गरि कार्यक्रम गर्न लागेको हौ ।’—उनले भने । जेठ ३ गते स्वर्गिय मदन भण्डारीको ३१ औ स्मृति दिवसको अवसर पारेर कार्यक्रम गर्न लागेको उनले बताए । हाफ म्याराथन २१ किलोमिटर (खुल्ला पुरुष), दौड १० किलोमिटर कलेज स्तरीय पुरुष, ५ किलोमिटर विद्यालयस्तर छात्र तथा ३ किलोमिटर दौड छात्रा र १ सय मिटर दौड छात्रछात्रा हुने छ । जेष्ठ नागरिकहरुलाई लक्षित गरि वाकाथन समेत हुने उनले बताए । ‘बालकदेखि वृद्धसम्म जोड्ने गरि खेलकुदलाई जोड्ने गरि कार्यक्रम अघि बढाएका छौ ।’—उनले भने ।

प्रतियोगिताको टप १५ खेलाडीहरुलाई पुरस्कृत गरिने उनले बताए । यसैगरि मुटुको शल्यक्रिया गरेका ओलम्पिक बैकुण्ठ मानन्धरलाई दुई वर्षका लागि मासिक ४ हजार रुपैयाका दरले एकेडेमीबाट जेठ ३ गते सहयोग रकम प्रदान गरिने उनले बताए ।

देशका राजनीतिक नेताको नामबाट हुने प्रतियोगिता रोक्ने शिक्षामन्त्रीको भनाई प्रति असहमती राख्दै अध्यक्ष आचार्यले राजनितिक सुझबुझ बिना निर्णय भएको दाबी गरे । देशका अधिकास विकास निर्माणका काम देशमा बलिदानी दिएका नेताहरुको स्मरणमा हुने गरेको उनले तर्क दिए । राजनितिक नेताहरुको नाममा खेलकुद गतिविधि र समाजमा जोडिनु उत्कृष्ट कार्य भएको उनले बताए ।

प्रतियोगिता संयोजक तथा एकेडेमीका एथ्लेटिक्स विभाग प्रमुख मोहन बहादुर घलेले दोस्रो पटक म्याराथन गर्न लागेको बताए । प्रतियोगिताको खुला पुरुष हाफ म्याराथनको उपाधि विजेताले नगद १ लाख, उपविजेताले ७५ हजारसहित तृतिय ५० हजार, चौथौ ३० हजार, पाचौ २० हजार, छैटौ १० हजार रुपैया पुरस्कार राशी रहेको छ । यसैगरि कलेजस्तरीय १० किलोमिटर छात्र दौडमा प्रथम, द्धितिय, तृतिय गरि क्रमश छैटौसम्म ३५, २५, १५, १०, ७ र ५ हजार रुपैया पुरस्कार रहेको छ । यसैगरि विद्यालय छात्रमा प्रथम देखि छैटौसम्म क्रमश २० हजार, १५ हजार, १२ हजार, १० हजार, ७ हजार र ५ हजार रहेको छ । छात्रा ३ किलोमिटर दौडको भने प्रथमदेखी छैटौसम्म क्रमश १५ हजार, १० हजार, ७ हजार, ५ हजार, ३ हजार र २ हजार रुपैया पुरस्कार रहेको छ । प्रतियोगिता सम्पन्न गर्न करीब ४० लाख रुपैया खर्च हुने आयोजकको अनुमान छ ।

एकेडेमीका सदस्य सचिव बिनोद आचार्यले भारतको ब्याडमिन्टन २१ एकेडेमीसंग सहकार्यमा नेपालको मदनभण्डारी एकेडेमी विकासका कार्यक्रम अघि बढाएको बताए । धेरै ट्यालेन्ट युवाहरु नेपालमा रहेको र उनिहरुलाई सहि बाटो दिने काममा आफुहरु अग्रसर रहेको उनले बताए । मदन भण्डारी स्पोर्ट्स एकेडेमीले खेलकुदमा गरेका गतिविधिको ९ मिनेटको भिडियो डकुमेन्ट्री समेत प्रस्तुत गरिएको थियो ।