खोज

बुटवल, ५ बैशाख । रुपन्देहीको तिलोत्तमा नगरस्थित श्रृङ्गेश्वर धाममा ऋष्यश्रृङ्ग ऋषिको शालिक अनावरण गरिएको छ । गुल्मेली सम्पर्क समाज रुपन्देहीको गुरुयोजना अनुसार धाम परिसरमा समाजका आजीवन सदस्य ई.कृष्णप्रसाद भण्डारी तथा लक्ष्मी पन्त भण्डारीको आर्थिक सहयोगमा ऋष्यश्रृङ्ग ऋषिको सम्मानमा शालिक निर्माण गरिएको हो ।

एक समारोहबिच समाजका अध्यक्ष डा. नारायणप्रसाद पन्थले रामनवमी २०८१ को पावन अवसर पारेर अनावरण गर्दै दानवीर भण्डारी परिवारप्रति आभार ब्यक्त गरे । ऋष्य श्रृङ्ग ऋषिको महिमा गान प्रस्तुत गर्दै उनले संस्कृति, संस्कारको रक्षामा नया पुस्तालाई लगाउन जरुरी रहेको बताए । प्राचीन युगमा ऋष्यशृङ्ग ऋषिको तपोभूमि एकातर्फ वर्तमान रुरु गा.पा. बलेटक्सार – तथा छत्रकोट गा. पा. धरमपोखराको शिरमा पर्ने श्रृङ्गा गुफा र अर्कोतर्फ तम्घासको शिरमा पर्ने रेसुङ्गामा तपस्या गरिबस्ने ऋष्यश्रृङ्ग ऋषि भएकाले उनै ऋषिको नाम अपभ्रंश भएर रेसुङ्गा र श्रृङ्गा भएको हो भन्ने तथ्य पाइने बताए । ऋष्यशृङ्ग ऋषिले नै दशरथका सन्तान नभएपछि अयोध्यामा गएर पुत्रेष्ठि यज्ञ गराएको र रामलक्ष्मण जन्मेको सन्दर्भ विभिन्न ग्रन्थहरूमा उल्लेख भएको उनले बताए ।

ऋष्यशृङ्ग मुनिको दर्शन गर्न अयोध्याबाट आएका राम र लक्ष्मणले तिनै ऋषिसँग त्यहाँका समस्याका बारेमा प्रश्न गरेका र ती ऋषिले पानीको समस्या बताएपछि जमिनमा बाण हानेर पानी निकालेको कुवाको नाम रामकुवाका नामले अहिले पनि त्यहाँ देख्न सकिने उनले बताए । शालिक निर्माणकर्ता ई. भण्डारीले ऐतिहासिक युगपुरूषको सम्मान सबैको दायित्व भएको बताए ।